Bisedimet e gjata deri pas mesnatës në Kremlin, mes presidentit Vladimir Putin dhe të dërguarve të Donald Trump, Steve Wittkof dhe Jared Kushner nuk prodhuan kompromis për ndonjë marrëveshje të mundshme paqeje për Ukrainën.
Këtë e tha këshilltari i lartë i politikës së jashtme në Moskë, Yuri Ushakov pas diskutimeve 5-orëshe, teksa theksoi se nevojitej shumë punë për të shkuar drejt një kompromisi. Sipas tij, Putin i kishte përcjellë një sërë sinjalesh të rëndësishme presidentit Trump, por se palët kishin rënë dakord për të mos i zbuluar detajet për mediat.
Uashkov bëri të ditur se kishin diskutuar, atë që e quajti “problem territorial”, e që lidhet me pretendimet e Rusisë për të përvetësuar të gjithë rajonin e Donbas, ku Ukraina kontrollon ende 5 mijë km katrorë.
“Natyrisht, diskutuam me kolegët amerikanë mbi përmbajtjen e atyre drafteve të planit të paqes, ato dokumente që amerikanët i dorëzuan Moskës pak kohë më parë. I shqyrtuam këto dokumente. Disa draft-propozime amerikane dukeshin pak a shumë të pranueshëm, por nevojiten diskutime. Disa formulime që na janë propozuar nuk mund të pranohem nga ne Putin nuk e fshehu qëndrimin kritik, madje negativ, ndaj tyre.”
Uashakov shtoi se nuk ishte planifikuar ndonjë takim Putin-Trump aktualisht, edhe pse foli për bisedime konstruktive dhe mundësi të mëdha bashkëpunimi ekonomik mes SHBA dhe Rusisë. Pasi përshkuan sheshin e kuq, nga mauzolemi i themeluesit të Bashkimit Sovjetik Vladimir Lenin tek kullat e Kremlinit, Wittkof dhe Kushner zhvilluan bisedimet me Ushakov dhe këshilltarit tjetër, Kirill Dmitriev, përmes përkthyesve.
Në një reagim nga Shtëpia e Bardhë pas takimit, Trump tha se situata nuk ishte aspak e lehtë.
“Me lejoni t’iu them, është një lëshim i madh”, tha ai, teksa shtoi se nga 25 mijë deri në 30 mijë njerëz çdo muaj po vdisnin në luftë. Që paqja është ende e largët u kuptua qartë nga tonet e presidentit Putin në një deklaratë më herët gjatë ditës. Ai paralajmëroi fuqitë europiane se nëse nisnin një luftë me Rusinë, Moska ishte gati të luftonte dhe se mundja e tyre do të ishte as aq absolute sa nuk do të mbetej më askush për të negociuar.
