Këtë të martë, 2 dhjetor 2025, Kolegji i Gjykatës Kushtetuese, i përbërë nga Sandër Beci, Sonila Bejtja dhe Marsida Xhaferllari, do të mblidhet për të shqyrtuar padinë e bërë nga kryeministri Edi Rama dhe Këshilli i Ministrave për konfliktin e kompetencave mes ekzekutivit dhe Gjykatës së Posaçme AntiKorrupsion për pezullimin e zëvendëskryeministres dhe njëherësh ministres së Infrastrukturës dhe Energjisë, Belinda Balluku.
Numri dy i kabinetit u mor e pandehur më 30 tetor, e akuzuar për “shkelje të barazisë në tendera”, lidhur me tunelin e Llogarasë, ndërsa më 20 nëntor me vendim të gjyqtarit të GJKKO-së, Erjon Çela, ajo u pezullua nga detyra në sajë të hetimeve për tenderin e Unazës së Madhe.
Më 22 nëntor, GJKKO verifikoi masat e sigurisë “pezullim nga detyra” dhe “ndalim i daljes jashtë vendit” për Ballukun.
Masa e “arrestit në shtëpi” u caktua për kreun e ARRSH-së Gentian Gjyli dhe administratorin e KESH, Erald Elezi, pas hetimeve të kryera për Unazën, specifikisht lotin e katërt të saj.
Pas akuzave nga kampi opozitar, kreu i qeverisë, Edi Rama mohoi çdo ndërhyrje dhe deklaroi dje se ankimin e vendimit të GJKKO-së e ka bërë si kryetar i qeverisë, për çështje parimore dhe jo personale.
Sipas tij, legjitimimi i pezullimit të ministrave me vendim të prokurorit apo gjyqtarit do të krijonte një precedent të rrezikshëm për funksionimin e pushteteve në vend.
“Presion gjykatës? Kryeministri nuk duhet të flasë për një proces gjyqësor. Me një pjesë nuk jemi kuptuar. Prandaj jam këtu duke e nisur me pyetjen, a e dini se kush e ka ankimuar në Kushtetuese pezullimin e ministres? E kam ankimuar unë si kryeministër dhe jo për individ, një ministre, që në këtë rast është edhe zv.kryeministre, por për parimin e moscenimit të balancës mes pushteteve, për parimin e mosndërhyrjes në një pushtet të pavarur, e mos marrjes së kompetencave të kryeministrit dhe presidentit nga një prokuror e gjykatës.
Unë jam palë dhe flas si palë, nuk i bëj presion askujt. Unë flas për publikun, për një proces që vendos jo për mua, por për balancën e pushteteve, për lirinë kushtetuese të kryeministrit për të vendosur për ekzekutivin dhe përbërjen e tij, të drejtën ekskluzive të parlamentit për të miratuar ose jo përbërjen e një qeverie”, ishte reagimi më i fundit i Ramës.
Edhe në podcastin e tij të dielën, kryeministri citoi Komisionin e Venecias dhe Gjykatën e Strasburgut sa i takon këtij rasti, që siç ai e ka theksuar shpesh, është i paprecedentë edhe përtej kontinentit.
“Qëndrimi i Venecias është shumë i prerë: Gjykatat nuk duhet të pezullojnë anëtarët e qeverisë, sepse duke bërë këtë, së pari cenojnë balancën e pushteteve. Për sa kohë një ministër është figurë politike, pjesë e ekzekutivit, përgjegjës para Parlamentit e kryeministrit, nëse Gjykata e pezullon ndërhyn në qeveri, merr kompetenca që i takojnë Kryeministrit dhe Presidentit, dhe kjo konsiderohet shkelje e palejueshme e ndarjes së pushteteve”, deklaroi Rama më 30 nëntor.
Reagimin e parë për çështjen “Balluku”, Rama e pati ditën e Samitit të Planit të Rritjes që u mbajt në Tiranë më 21 nëntor. Krah Komisioneres për Zgjerimin e BE-së, Marta Kos, kreu i qeverisë shqiptare paralajmëroi kundëpërgjigje vetëm ligjore ndaj vendimit, duke theksuar se ky i fundit cenon pavarësinë e ekzekutivit dhe tejkalon kompetencat e një institucioni drejtësie. Megjithatë, Rama e ka thënë shpesh se “qeveria do e garantojë gjithnjë pavarësinë e gjyqësorit, me çdo çmim”.
Komisionerja Kos nuk e komentoi rastin, ndërsa nënvizoi se Shqipëria ka bërë luftë të rëndësishme kundër korrupsionit.
Balluku nuk ka dhënë asnjë koment deri më tani, ndërsa deklarata e saj e fundit ishte në foltoren e Kuvendit ku tha se “nuk do të merret kurrë me prokurorë e gjyqtarë”.
“Nuk do prononcohem kurrë për çështje nën hetim pasi ato kanë rrugën e tyre, të cilën do e ndjek me diskrecion të plotë derisa e vërteta të marrë formë të prerë, cilado qoftë ajo! Por, unë si gjithë kolegët e mi, mbështesim reformën në drejtësi, edhe kur prekemi personalisht pasi ndryshe nga sa thoni, PS-ja është një formacion politik serioz, i vetmi në Shqipëri, ku fjala e secilit dëgjohet e ka peshë, ndaj në respekt të plotë të saj nuk kam asnjë koment”, u shpreh Balluku më 19 nëntor.
