Në vitin 2024, Joe Biden përjetoi një realitet të vështirë: u detyrua të tërhiqej nga gara për një mandat të dytë, pasi aleatët e tij evidentuan kufizimet e moshës që u dukën qartë gjatë një debati televiziv. Donald Trump nuk ngurroi ta sulmonte, duke e quajtur vazhdimisht “Old Joe” dhe duke i bërë shaka për gjendjen mendore zakon që ende e vazhdon.
Sot, presidenti aktual mund të përballet me një lloj “ndëshkimi” të ngjashëm! Eedhe ai, më i moshuari që ka fituar presidencën amerikane, në moshën 79-vjeçare po tregon shenjat e para të lodhjes.
Nga takime më të rralla, deri te fjalimet që shpesh degjenerojnë në devijime agresive, me njolla në lëkurë dhe kyçe të ënjtura presidenti Trump po përballet me realitetin e moshës.
Këto shqetësime janë rritur edhe pas sugjerimeve të nipit të tj, Fred III, për një mundësi të hershme të Alzheimerit, duke u nisur nga historia e sëmundjeve në familje (edhe babai i Donaldit ishte prekur). Për të qetësuar spekulimet mbi kyçet e ënjtura, zëdhënësja Karoline Leavitt theksoi: «Trump ka insuficiencë venoze. Ai është transparent, ndryshe nga Biden që fshehu gjithçka».
Për presidentin që ka ndërtuar imazhin e tij mbi energjinë dhe qëndrueshmërinë fizike, këto shenja përbëjnë një sfidë. Dr. Sean P. Barbabella, mjeku personal dhe osteopat i Marinës, deklaroi në prill se: “Presidenti Trump shfaq shëndet të shkëlqyer mendor dhe fizik dhe është plotësisht i aftë të kryejë detyrat e tij si Komandant i Përgjithshëm dhe kreu i shtetit.”
Megjithatë, gjatë këtij viti, ënjtjet dhe shenjat në kyçe ushqyen spekulime mbi gjendjen e tij shëndetësore, pavarësisht qetësimit të zëdhënëses: Trump nuk bën aktivitet fizik të rregullt, beson se energjia njerëzore është e kufizuar, ushqehet me hamburgerë dhe mish të kuq, dhe ka humbur disa kilogramë (nga 110 në 101 kg). Ai përmend shpesh Ozempic, ilaç kundër mbipeshës, por mjekët nuk konfirmojnë përdorimin e tij.
Një investigim i New York Times tregon se stafi i tij përpiqet të mbulojë shfaqjen publike të dobësive fizike, duke kufizuar ngjarjet nga ora 12:00 deri në 17:00, krahasuar me fillimin e ditës në 10:30 gjatë mandatit të parë. Numri i paraqitjeve publike ka rënë me 39%, nga 1,688 në 1,029 ngjarje të regjistruara në të njëjtin periudhë.
Fjalimet e tij publike shpesh janë të gjata, agresive dhe të çrregullta, duke kaluar nga një temë në tjetrën, të mbushura me ekzagjerime ose informacione të pasakta. Dieta dhe mungesa e aktivitetit fizik, si dhe konsumimi i rregullt i pijeve të gazuara, nuk e bëjnë situatën më të qetë.
Historikisht, presidentët kanë tentuar të japin një imazh të mirë për shëndetin e tyre. Matthew Dallek, historian politik nga Universiteti George Washington, thekson për NYT se: «Rrethi i tij vepron siç bënë bashkëpunëtorët e Bidenit. Ata krijojnë një imazh për shëndetin për të fshehur të vërtetën e thjeshtë: ai ka 79 vjet dhe është një nga presidentët më të moshuar në histori».
Trump ka zgjedhur vetë çfarë t’i tregojë publikut, duke shmangur pyetjet e gazetarëve edhe pas sëmundjes nga COVID-19 apo atentatit të vitit të kaluar.
Pavarësisht moshës, ai vazhdon të mendojë për të ardhmen politike, duke promovuar tashmë simbolikisht zgjedhjet e 2028-s. Por së fundmi, ka filluar të flasë më shpesh për jetën pas vdekjes, duke e lidhur me paqen në Ukrainë dhe rolin e tij në religjion, krahasuar me Bidenin, që e ka minimizuar këtë aspekt.