Kreu i partisë Demokratike, Sali Berisha, i është rikthyer përsëri ngjarjes së rëndë të ndodhur ditën e djeshme pranë aeroportit të Rinasit (11 nëntor), ku u vra në atentat në mes të ditës Gilmando Dani, krahu i djathtë i Emiljano Shullazit dhe mbeti i plagosur rëndë miku i tij Muçi Shaljani (Sheqeri), agjent i AMP-së.
Duke ironizuar Policinë e Shtetit, teksa postoi në Facebook edhe videon e momentit të vrasjes, lideri i selisë blu shkruan se uniformat blu nuk i panë vrasësit sepse i kishin sytë të zënë nga maskat.
“Vrasësit i panë të gjithë, përveç narko-policisë që kishte mbyllur sytë me maska!”, thekson ai në reagimin e shkurtër karshi pamjeve.
Video e atentatit u publikua edhe nga “Panorama Online”, ku dallohen qartë ekzekutorët me taktikë komando apo paramilitarë, të organizuar, të cilët i zënë pritë në mes të rrugës dhe qëllojnë me breshëri automatikësh veturën “Benz” me ngjyrë të bardhë, ku udhëtonin Dani dhe Shaljani, që sapo ishin kthyer nga Barcelona.
Berisha reagoi edhe gjatë konferencës për shtyp mesditën e sotme, ku akuzoi ministrinë e Brendshme dhe Policinë e Shtetit se rendi dhe siguria nuk ekzistonin dhe ishin kthyer në rrezik për jetët e qeveritarëve, me atentate në mes të ditës dhe autorë që largoheshin të pashqetësuar.
“Ekzekutimi publik i Gilmando Danit dhe plagosja e rëndë e Muçi Shaljanit janë një ngjarje e cila u patronua kryekëput nga shteti, për llogari të bandave më të afërta me qeverinë sesa banda e Shullazit. Nuk ekziston asnjë zonë tjetër në vend ku të jenë të përqendruara kaq shumë forca policore. Ajo është vetëm 100 metra nga rajoni i Policisë së Rinasit dhe pak metra nga dalja e sallonit VIP”, tha Berisha mes të tjerash.