Dy lëkundje tërmeti janë regjistruar pasditen e kësaj të premteje në qarkun e Elbasanit, duke u ndjerë edhe në disa zona të Tiranës dhe Durrësit. Sipas të dhënave të publikuara nga Instituti i Gjeoshkencave, lëkundja e parë është regjistruar në orën 15:40:00, me magnitudë 3.9 të shkallës Rihter dhe thellësi 15 kilometra. Epiqendra është lokalizuar në zonën e Bradasheshit, në Elbasan.
Vetëm një sekondë më pas, në orën 15:40:01, është regjistruar edhe një tjetër lëkundje me të njëjtën magnitudë, 3.9, por me thellësi 10 kilometra. Sipas IGJEUM, epiqendra e saj ka qenë në Papër, Elbasan.
Lëkundjet janë ndjerë nga banorë të Elbasanit, ndërsa raportime për lëvizje të tokës kanë ardhur edhe nga periferia e Tiranës dhe Durrësit.
Deri më tani nuk raportohen dëme materiale apo persona të lënduar.
