Tregjet financiare botërore janë përfshirë nga një valë e fuqishme pasigurie këtë fillim jave. Eskalimi i konfliktit në Lindjen e Mesme dhe paralajmërimet e SHBA-së për goditje mbi infrastrukturën energjetike të Iranit kanë shkaktuar rënie të forta të indekseve në Azi dhe rritje të menjëhershme të çmimeve të naftës dhe gazit.
Gazi dhe nafta në rritje galopante
Kërcënimi për mbylljen e Ngushticës së Hormuzit ka alarmuar tregjet evropiane. Në bursën e Amsterdamit, kontratat e gazit TTF shënuan një rritje prej 2.1%, duke kaluar pragun e 60.5 eurove për megavat orë.
Ndërkohë, ari i zi vazhdon të qëndrojë në nivele kritike. Nafta ka shkuar mbi 100 dollarë për fuçi.
Pritet rritje e çmimit të benzinës që në ditët e para të javës.
Azi, bursat në “territor të kuq”
Tregjet aziatike kanë reaguar me rënie drastike, të udhëhequra nga frika e zgjerimit të konfliktit. Në Seul (Koreja e Jugut), indeksi Kospi ra me mbi 4%, ndërsa monedha kombëtare (Woni) preku nivelin më të ulët në 17 vitet e fundit, duke u këmbyer me 1,510 kundrejt dollarit.
Në Tokio (Japoni) indeksi Nikkei u hap me një humbje prej 1.67% (rreth 893 pikë), i ndikuar edhe nga performanca negative e Wall Street.
Në Hong Kong dhe Kinë indeksi Hang Seng pësoi rënie me 2.41%, ndërsa bursat e Shangait dhe Shenzhenit humbën respektivisht 1.59% dhe 1.17%.
Analistët paralajmërojnë se nëse Ngushtica e Hormuzit nuk rihapet për tranzit, goditja mbi ekonominë globale mund të jetë edhe më e rëndë. Deklaratat e fundit të Presidentit të SHBA-së, Donald Trump, për mundësinë e bombardimit të infrastrukturës energjetike të Iranit, kanë rritur frikën për një krizë të re furnizimi.
