Policia e Elbasanit finalizoi operacionin e koduar “Kamuflimi”, duke kapur në flagrancë shtetasin E. E., 32 vjeç, nga Peqini, në fshatin Bradashesh. Ai drejtonte një automjet “Audi” të kamufluar me fenelina të ngjashme me ato të Policisë për të shmangur kontrollet.
Gjatë kontrollit u sekuestruan arma e zjarrit, municioni, fenelinat dhe automjeti. Materialet iu referuan Prokurorisë për veprat penale “Mbajtja pa leje e armëve” dhe “Mbajtja pa të drejtë e uniformës”.
Njoftimi i policisë:
Elbasan
Finalizohet operacioni i koduar “Kamuflimi”.
Strukturat e Policisë së Shtetit vijojnë kontrollet intensive për parandalimin dhe goditjen e çdo paligjshmërie që cenon rendin dhe sigurinë publike.
Shërbimet e Komisariatit të Policisë Elbasan, në bashkëpunim me Sektorin e Qarkullimit Rrugor, bazuar në informacionet e siguruara në rrugë operative, organizuan dhe finalizuan operacionin policor të koduar “Kamuflimi”.
Si rezultat i këtij operacioni, u kap në flagrancë dhe u vu në pranga shtetasi E. E., 32 vjeç, banues në Peqin.
Ky shtetas u lokalizua në fshatin Bradashesh, duke drejtuar një automjet tip “Audi”, në pjesën e përparme të të cilit kishte vendosur fenelina të ngjashme me ato të Policisë, me qëllim kamuflimin si mjet zyrtar dhe shmangien e kontrolleve nga shërbimet e Policisë.
Gjatë kontrollit në automjet, shërbimet e Policisë gjetën një armë zjarri pistoletë me fishekë, e cila u sekuestrua në cilësinë e provës materiale, së bashku me fenelinat dhe automjetin.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Mbajtja pa të drejtë e uniformës”.
