Kryeministri Edi Rama, në konferencën e fundit për mediat këtë vit, ka folur për një sërë çështjesh. Vitin e shkuar, më 30 dhjetor 2024, ai theksoi se Partia Socialiste ka bërë një transformim epokal të vendit.
Veçanërisht u ndal te administrata publike dhe sofistikimi i dhënies së shërbimit ndaj qytetarëve. “Morëm një vend të zhytur në borxhe e pluhur, sot jemi në kushte të tjetra, është bërë një transformim epokal. Jemi vend avangard në drejtim të shërbimeve online”, ka thënë numri një i kabinetit.
Teksa vuri theksin te platforma e-Albania, kreu i qeverisë përmendi edhe futjen në platformë të një “asistenti të ri virtual me zë e figurë”.
Foli edhe për TikTok, platformë për të cilën parashikohet të japë deklarata edhe sot, pasi po mbushet thuajse 1 vit që është mbyllur në territorin e vendit tonë.
Negociatat për anëtarësimin e plotë në Bashkimin Europian padyshim do jetë një temë kryesore e Ramës, pasi janë çelur të gjithë grup-kapitujt me BE dhe gjithë ky proces nga kreu i qeverisë konsiderohet prioritet.
Konferencën e nisi me një lajm të mirë, për indeksin lidhur me lirinë njerëzore dhe ekonomike.
“Shqipëria ka një pozicion shumë inkurajues, e 39-ta në klasifikimin e përgjithshëm dhe vetëm e 9-ta në gjithë pjesën e Europës lindore”, deklaroi ai.
“Sa i përket lirisë ekonomike, renditet para vendeve si Polonia, Kroacia, Greqia apo Hungaria. Po ashtu për lirinë njerëzore”, shtoi më tej, duke e cilësuar një pasqyrë tejet pozitive.
Kryeministri tha se “krahasuar me vendet e Ballkanit Perëndimor, Shqipëria është vend lider në funksionimin e administratës, menaxhimin e financave publike, të burimeve njerëzore dhe shërbimeve publike.
“Normalisht kjo është kundër çorbës që zien në tenxheret mediatike e politike”, shtoi ai me ironi.
Rritje e investimeve të huaja dhe shtim i bizneseve të reja
Sipas kryeministrit, bizneset e reja janë shtuar me afro 11% këtë vit.
“Investimet e huaja vetëm në 3-mujorin e tretë kanë pasur një rritje mbi 10% dhe stoku i tyre është domethënës dhe më i lartë me mbi 10% krahasimisht me vitin e mëparshëm.
Paga mesatare ka rezultuar 833 euro, kemi për pak ditë edhe hyrjen në fuqi të ligjit për pagën minimale që shkon në 500 euro.”
Më tej u ndal te rritja “vit pas viti” e pensioneve.
“Buxheti për arsimin profesional është rritur ndjeshëm dhe do të rritet edhe më shumë vitin e ardhshëm. Sa i përket politikave të strehimit social, ka pasur mbështetje për rreth 4 mijë familje dhe jemi duke përgatitur reformën e strehimit social për të hapur një epokë krejt të re dhe për të rritur numrin e përfituesve”, deklaroi Rama.
Më tej, kreu i qeverisë tha se edhe këtë vit ka ulje të borxhit. Sipas tij, ka pasur një rritje të të ardhurave nga tatimet dhe doganat, duke theksuar se kjo ka ndodhur “pa rritur taksën”.
