Hetimi nga SPAK për fondet e Kuvendit të Rithemelimit, që parapriu kthimin e Sali Berishës në Partinë Demokratike, ka nisur pas një kallëzimi të bërë nga Gazmend Bardhi në fund të 2021 në Prokurorinë e Posaçme.
Në këtë kallëzim, ish-sekretari i përgjithshëm i PD paditi Këlliçin, Vokshin dhe Spahon si organizatore të Kuvendit. Një ditë më parë Belind Këlliçi u pyet në SPAK për origjinën e parave dhe faturat, ndërsa sot u thirr anëtari i kryesisë Indrit Hoxha.
Analisti Frrok Çupi ka komentuar zhvillimet e fundit politike, duke adresuar kritika të forta ndaj Partisë Demokratike. I ftuar në emisionin “Tirana Live” në ABC News, Çupi u shpreh se PD ka qenë një bezdi e vazhdueshme për shoqërinë shqiptare.
Sipas tij, Partia Demokratike përfaqëson një grupim njerëzish dhe interesash që, në historinë e Shqipërisë, ka shkaktuar dëme të mëdha. Çupi deklaroi se PD, gjatë gjithë ekzistencës së saj, i ka borxhe vendit, duke e poshtëruar, duke shkaktuar viktima dhe duke grabitur pasuri.
Analisti krahasoi ish-kryeministrin Sali Berisha me regjimin e Ajatollahut në Iran, duke theksuar se gjatë qeverisjes së tij janë vrarë protestues, pavarësisht numrit. Ai e cilësoi PD-në si “partinë më kriminale që ka parë historia e Shqipërisë” dhe shtoi se raportet e saj me vendin kanë qenë të shtrembëra.
“PD i rri në hundë njerëzve gjithë kohës. Është një bezdi shumë e madhe. Kjo është një parti, grupim njerëzish dhe interesash, ky është grupimi më i dëmshme që ka parë Shqipëria në historinë e saj. PD, jo sot, por gjatë gjithë jetës së saj i ka borxhe Shqipërisë, e ka poshtëruar këtë vend, i ka vrarë njerëzit dhe u ka grabitur pasuritë. Berisha si Ajatollahu, të dy kanë vrarë protestues. Nuk ka rëndësi numri, por kanë vrarë. PD është partia më kriminale që ka parë historia e Shqipërisë. Raportet që ka PD me Shqipërinë, janë raporte të zhdrejta. Këta e shëmtojnë vendin”, u shpreh ai
