Një tjetër person ka rënë në pranga lidhur me ngjarjen e ndodhur në datën 2 janar në Berat, ku u qëllua me armë në drejtim të dy personave.
Përmes një njoftimi, Policia bën të ditur se pas arrestimit të një 46-vjeçari ditën e djeshme që bashkëpunoi me një 32-vjeçar për lëvizjen e automjetit nga i cili qëlluan 2 vëllezërit, nga Berati dhe fshehjen e tij në Durrës, ditën e sotme është prangosur edhe vetë 32-vjeçari në fjalë.
Gjithashtu, u sekuestruan automjeti dhe arma e zjarrit që përdorën 2 vëllezërit e dyshuar për këtë ngjarje.
Ndërkohë Policia vijon punën për kapjen e 2 vëllezërve, të cilët qëlluan me armë zjarri drejt dy personave të tjerë.
Njoftimi i Policisë:
Berat-Vijojnë hetimet e thelluara rreth ngjarjes së datës 02.01.2025, në lagjen “Donika Kastrioti”. Si rezultat identifikohet dhe vihet në pranga një tjetër shtetas që përkrahu autorët e krimit.
Ditën e djeshme, u arrestua një 46-vjeçar që bashkëpunoi me 32-vjeçarin, për lëvizjen e automjetit, nga Berati, dhe fshehjen e tij në Durrës. Gjithashtu, u sekuestruan automjeti dhe arma e zjarrit që përdorën 2 vëllezërit e dyshuar për këtë ngjarje.
Në vijim të veprimeve të thelluara hetimore dhe procedurale, të kryera në drejtimin e prokurorit, specialistët për Hetimin e Krimeve të DVP Berat vunë në pranga shtetasin A. H., 32 vjeç, banues në Durrës. Ai dhe shtetasi E. D. (i ndaluar dje, në PKK Kakavije) dyshohet se kanë lëvizur nga Berati dhe kanë fshehur në Durrës, automjetin tip “Ford”, nga i cili dyshohet se kanë qëlluar me armë zjarri, vëllezërit F. M. dhe M. M., në drejtim të shtetasve A. M. dhe A. Dh.
Vijojnë kërkimet për kapjen e shtetasve F. M. dhe M. M.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
