Pak minuta përpara se armëpushimi midis Izraelit dhe Hamasit të skadonte në orën 7 të mëngjesit, ushtria izraelite njoftoi se armëpushimi do të zgjatej edhe për 24 orë të tjera, mes përpjekjeve të ndërmjetësuesve për të rifilluar procesin e lirimit të pengjeve.
Lëvizja islamike palestineze Hamas njoftoi, nga ana tjetër, se kishte rënë dakord të zgjaste, për të shtatën ditë, armëpushimin me ushtrinë izraelite në Rripin e Gazës që ka qenë në fuqi që nga e premtja.
Zgjatja e armëpushimit u konfirmua edhe nga Katari, vendi që vepron si ndërmjetës midis palëve me mbështetjen egjiptiane dhe amerikane, pak minuta pasi skadoi zyrtarisht “pauza humanitare” gjashtëditore e armiqësive.
“Palët palestineze dhe izraelite kanë rënë dakord të zgjasin armëpushimin humanitar në Rripin e Gazës për një ditë shtesë,” tha në një deklaratë për shtyp zëdhënësi diplomatik i Emiratit të Gjirit, Majid al- Ansari.
Krahu i armatosur i Hamasit gjithashtu – përpara rinovimit të armëpushimit – u bëri thirrje anëtarëve të saj në Rripin e Gazës që të përgatiten për mundësinë e rifillimit të luftës me ushtrinë izraelite. “Brigadat Al-Qassam u bëjnë thirrje forcave të saj aktive që të mbajnë një nivel të lartë të gatishmërisë luftarake në orët e fundit të armëpushimit”, thuhet në një deklaratë të lëshuar nga krahu i armatosur i lëvizjes islamike palestineze.
Teksti u kërkon anëtarëve të tij të qëndrojnë në gatishmëri “përveç nëse një deklaratë zyrtare” lëshohet nga Hamasi që “do të konfirmojë zgjatjen” e armëpushimit./Liberale.al
