Një studim i ri ka zbuluar se mediat gjermane fryjnë në mënyrë të rreme nivelin e krimit të kryer nga të huajt. Studimi, i titulluar “Krimi dhe Migrimi: Perceptimi në Median Gjermane”, zbuloi se të dyshuarit e huaj përmenden në media rreth tre herë më shpesh sesa pjesa e tyre në statistikat zyrtare të krimit të policisë.
Profesor i gazetarisë, Thomas Hestermann, udhëheqësi i studimit nga Universiteti i Shkencave të Aplikuara Macromedia në Hamburg, e cilësoi këtë gjetje si një “shtrembërim drastik” në raportimin mediatik që nga viti 2015, pas ardhjes së një numri të madh emigrantësh në Gjermani.
Sipas Hestermann, ky mbulim i tepërt ndikon në opinionin publik, duke ndryshuar perceptimin e njerëzve për dhunën dhe duke i bërë ata të pyesin: “Kush përbën një kërcënim?”
Ai dha shembullin e dy sulmeve të ngjashme me makina në Mynih dhe Mannheim në vitin 2025. Sulmi në Mynih, ku i dyshuari ishte një i ri afgan, mori dyfishin e raportimit në televizion dhe gazeta.
Incidenti i ngjashëm në Mannheim, ku i dyshuari ishte një burrë gjerman, u mbulua shumë më pak.
Hestermann sugjeroi se ndërsa vendimet editoriale mund të jenë shpesh “intuitive”, rezultati përfundimtar është një model raportimi që “ndjek një agjendë populiste të krahut të djathtë”.
Krimi lidhet me faktorë socialë, jo me origjinën
Kriminologia dhe sociologia Gina Wollinger, e cituar në studim, e quan këtë shtrembërim një “emigrim” të krimit, duke argumentuar se origjina vihet në dukje vetëm kur autorët nuk janë gjermanë.
Ajo theksoi se faktorët e rrezikut për krimin janë të lidhur me varfërinë, mungesën e perspektivës dhe përvojat personale të dhunës, dhe jo me origjinën apo pasaportën.
Si zgjidhje për korrigjimin e këtij çekuilibri, Hestermann sugjeroi që zyrat editoriale të bëhen më të larmishme dhe të pasurohen nga të rinj që vijnë nga kultura të ndryshme.