Të shtunën mbrëma, 11 tetor, një familje shqiptare është sulmuar nga një grup tifozësh serbë në Zyrih të Zvicrës.
Ngjarja e rëndë, ndodhi menjëherë pas ndeshjes së futbollit Serbi-Shqipëri, ku “kuqezinjtë” arritën fitore historike në Leskovav me rezultat 0-1 me golin e Rey Manajt.
Familja në fjalë kishte dalë për të festuar fitoren e kombëtares, dhe po udhëtonin me makinëne tyre, ku valëvisnin flamurin shqiptar, raporton Klan Kosova.
Këtë rast e ka raportuar edhe gazeta e njohur Blick, ku thotë se një i ri shkatërroi xhamin e përparmë të makinës me një mjet të fortë.
“Copat e xhamit fluturuan në pjesën mbrapa, ku ishte vajza jonë 10-vjeçare”, ka rrëfyer shqiptarja e cila ndodhej në makinë me bashkëshortin dhe të bijën.
Me lot në sy, ajo ka rrëfyer se nuk e kishte imagjinuar kurrë se një gjë e tillë do të ndodhte në Zvicër.
Lidhur me rastin është njoftuar edhe policia e Zyrih-ut, megjithëse nuk ishte i vetmi incident gjatë asaj mbrëmjeje.
Edhe në Luzerne, pas ndeshjes u raportuan për përleshje dhe provokime mes tifozëve të Serbisë dhe Shqipërisë.