Alpinistët po përballen me kushte ekstreme të motit pas një stuhie të pazakontë dëbore në Kinë. Qindra persona janë bllokuar në malin Everest dhe është dashur një operacion i madh shpëtimi.
Autoritetet kineze thonë se rreth 350 persona janë evakuuar, por të paktën 200 të tjerë mbeten të bllokuar në zonën turistike të Everestit, nga ana tibetiane e kufirit.
Turistët kishin shkuar atje për “Golden Week”, një periudhë pushimesh 8-ditore në Kinë. Por reshjet e dendura të dëborës prej 3 ditësh, bllokuan qindra persona në kampet mbi 4 900 metra lartësi.
“Ishte moti më i vështirë që kam përjetuar ndonjëherë”, tha një alpinist kinez, duke përshkruar se bora kishte mbuluar pothuajse të gjithë majën e malit.
Shumë nuk mund të flinin sepse bora grumbullohej shpejt dhe ishin të detyruar ta pastronin vazhdimisht.
Fotot tregojnë tendat të mbuluara nga bora dhe njerëz që mezi ecin në dëborën që ka shkuar rreth 1 metër lartësi. Të gjithë ata që zbritën nga lartësia e malit, arritën të shkojnë në Qudang, një qytet i vogël rreth 48 km larg bazës tibetiane të Everestit.
Të paktën 200 alpinistë të tjerë mbeten të bllokuar, por janë kontaktuar dhe po ndihmohen nga shpëtimtarët. Autoritetet kanë pezulluar hyrjen në zonën turistike të Everestit deri të përmirësohet moti.
Në të njëjtën kohë, mot ekstrem ka goditur edhe vendet fqinje. Në Nepal, reshjet e dendura kanë shkaktuar rrëshqitje dhe përmbytje, duke bllokuar rrugët dhe shkaktuar të paktën 47 viktima.