E mbijetuara e Holokaustit, Ruth Posner dhe bashkëshorti i saj, Michael, të dy rrreth të 90-ave, kanë ndërruar jetë në një klinikë eutanazie në Zvicër.
Aktorja polake 96-vjeçare që ia mbathi nga një kamp nazist kur ishte fëmijë dhe ndërtoi një karrierë të suksesshme në kërcim e dramë, ndërroi jetë javën e shkuar në klinikën Pegasos pranë Bazelit, raporton BBC.
Ajo dhe 97-vjeçari u dërguan familjes e miqve një letër të martën ku i vinin në dijeni për vendimin e tyre, sipas skenaristes Sonja Linden.
Në letër, çifti shkruante se “u vinte keq që s’e kishin përmendur, por kur të merrni këtë email ne do të kemi zhveshur këtë mbulesë të vdekshme.”
“Vendimi ishte i përbashkët dhe pa presion të jashtëm. Ne kishim jetuar një jetë të gjatë bashkë për thuajse 25 vjet. Erdhi një pikë kur shqisat e të parit dhe të dëgjuarit po na linin dhe mungesa e energjisë nuk ishte jetesë, por ekzistencë që asnjë përkujdesje nuk do ta përmirësonte. Ne patëm një jetë interesante dhe të larmishme, përveç dhimbjes për humbjen e djalit tonë, Jeremy. Ne e shijuam kohën tonë bashkë, u përpoqëm të mos kishim pendesa për të shkuarën, të jetonim në të tashmen dhe të mos prisnim shumë nga e ardhmja. Me shumë dashuri, Ruth & Mike”, shkruhej në letër.
Pjesa më e madhe e familjes së Ruth u vranë gjatë Holokaustit, përfshirë prindërit dhe të afërmit, vetëm një teze e saj mbijetoi.
Familja u dërgua në kampin Radom pas pushtimit të Polonisë nga nazistët, por me ndihmën e të atit, ajo u arratis dhe më pas u fsheh te një familje katolike. Edhe pse jetonte me një identitet të rremë,ajo u burgos si katolike polake pas Betejës së Varshavës në 1944. Më pas u fsheh në një fermë pranë Essen deri në fund të Luftës së Dytë Botërore dhe në moshën 16-vjeçare u arratis drejt Mbretërisë së Bashkuar.
Atje iu bashkua Teatrit të Baletit Kontemporan në Londër dhe iu bashkua Shakespeare Company.
Kurse Michael, një farmacist, punonte për UNICEF dhe pasi udhëtuan nëpër botë,u vendosën në Londër.
Sonja Linden tha se Ruth kishte qenë pro legalizimit të vdekjes së asistuar në Angli. Parlamenti po e konsideron ndryshimin e ligjit i cili do të aplikohet vetëm për pacientë me sëmundje të pashërueshme që pritet të ndërrojnë jetë brenda gjashtë muajsh.
Sipas raportimeve, asnjëri nga të dy nuk vuante nga ndonjë sëmundje e tillë.