Drejtori i Lëvizjes Europiane në Shqipëri, Gledis Gjipali, i ftuar në Klan News me moderatorin Drini Zeqo, tha se fryma ndërkombëtare për anëtarësimin e Shqipërisë në Bashkimin Europian është shumë pozitive, por paralajmëroi se procesi mbetet i pasigurt për shkak të zhvillimeve të paparashikuara globale.
“Fryma është shumë pozitive, por asgjë nuk është e sigurt. Siç e përmenda, kemi zhvillime krejt të paparashikuara, lufta në Ukrainë, pandemia me pasojat e saj, së fundmi edhe politika e presidentit Trump, që nuk e sheh më Europën si partnere, por si aleate. Të gjitha këto sjellin paqartësi në vendimmarrje, aq më tepër për Bashkimin Europian, ku ka fërkime mes vendeve anëtare. Megjithatë është shumë pozitive që zgjerimi shihet mirë, veçanërisht për Shqipërinë dhe Malin e Zi”, tha Gjipali.
Ai theksoi se kjo është një periudhë vendimtare për vendin: “Ky është një moment historik që duhet kapur, ndryshe rrezikojmë të humbasim edhe dekada të tjera. Nuk duhet ta lëmë të ikë kjo mundësi”.
Në lidhje me procesin e negociatave, Gjipali tha se Shqipëria ka njohur problematikat e kapitujve themelorë si shteti i së drejtës, reforma në drejtësi, lufta kundër korrupsionit dhe krimit të organizuar, si dhe të drejtat e njeriut. Sipas tij, këto janë fusha ku ka ekspertizë dhe mbi të gjitha kërkohet vullnet politik për të ecur përpara.
Megjithatë, drejtori i Lëvizjes Europiane paralajmëroi për sfida të mëdha në kapitujt që pritet të hapen së shpejti.
“Problematike janë grupkapitujt që lidhen me mjedisin, zhvillimin rural, mbrojtjen e konsumatorit dhe sigurinë ushqimore. Këto kanë aspekte teknike dhe financiare, me kosto për bizneset dhe qytetarët. Shoh më pak përgatitje nga strukturat shtetërore, për faktin se nuk kanë qenë prioritet në vitet e kaluara”, u shpreh Gjipali.