Në një intervistë për Daily Caller, Presidenti amerikan Donald Trump është shprehur i gatshëm të angazhojë avionë amerikanë si garanci sigurie për të ndihmuar në përfundimin e luftës mes Rusisë dhe Ukrainës.
“Ndoshta do të bëjmë diçka. Do të më pëlqente të shihja një zgjidhje. Nuk janë ushtarët tanë, por çdo javë vriten nga pesë deri në shtatë mijë persona, kryesisht të rinj. Nëse do të mund ta ndaloja këtë, dhe herë pas here të fluturoja ndonjë avion, do të ishin kryesisht europianët që do të angazhoheshin, por ne do t’i ndihmonin”, u shpreh Trump.
Presidenti amerikan e konsideroi të pamundur një takim dypalësh midis Presidentit rus Vladimir Putin dhe homologut ukrainas Volodymyr Zelensky, por nuk përjashtoi një takim trepalësh me pjesëmarrjen e tij.
“Një takim trepalësh mund të ndodhë. Një takim dypalësh nuk e di, por ai trepalësh do të ndodhë. Por, ndonjëherë njerëzit nuk janë të gatshëm,” shtoi ai.
Trump theksoi marrëdhëniet e mira që ka pasur me Putinin ndër vite.
“Kemi pasur një marrëdhënie shumë të mirë, ndaj besoja vërtet se do të mund të gjenim një zgjidhje. Do të më kishte pëlqyer shumë që të ndodhte”.
Nga ana tjetër, dy ditë më parë Presidenti ukrainas Volodymyr Zelensky hodhi poshtë idenë për krijimin e një zone tampon mes forcave ukrainase dhe ruse si pjesë e një marrëveshjeje paqeje.
Kurse zëdhënësja e Ministrisë së Jashtme të Rusisë tha se garancitë e sigurisë për Ukrainën duhet të jenë rezultat i zgjidhjes së konfliktit, e jo parakusht për bisedime.
