Deputeti i PD, Gazment Bardhi, ka reaguar ashpër pas ndërhyrjes së policisë dhe ndërprerjes së transmetimit të News24, duke e cilësuar këtë ngjarje si “akt kriminal, represion policor dhe sulm të paprecedentë ndaj fjalës së lirë”.
Bardhi thekson se “ky aksion banditesk po udhëhiqet nga një kriminel, si Ardi Veliu, njeriu me lidhje të njohura me krimin e organizuar dhe me mijëra faqe transkripte në SPAK që e provojnë si shërbëtor të bandave”.
Deputeti demokrat i bëri thirrje SPAK të ndërhyjë menjëherë: “Veproni sot ose nesër do të jetë shumë vonë! Ky është një sulm i drejtpërdrejtë ndaj lirisë së medias dhe demokracisë në vend.”
Reagimi i plote i Gazment Bardhit:
Nuk po u besoja syve si qytetar, si jurist dhe si deputet, teksa shihja se si forcat e policisë së një vendi kandidat për në BE kanë rrethuar redaksinë e televizionit më të ndjekur informativ, News24, redaksinë e Balkanweb, Gazetës Panorama dhe Gazetës Shqiptare, duke i penguar të ushtrojnë misionin e tyre të shenjtë – atë të informimit me paanësi dhe profesionalizëm të publikut. Ky është një akt tronditës, një sulm i paprecedentë dhe represion policor ndaj fjalës së lirë.
Me këtë vendim tërësisht arbitrar dhe të paligjshëm, është cenuar në mënyrën më brutale liria e medias – një vlerë e shenjtë për demokracinë e një vendi. Gazetarët janë nxjerrë forcërisht nga ambientet e punës, ndërkohë që medias më të ndjekur informative News24, i është hequr në mënyrë brutale energjia dhe transmetimi.
Kjo ndërhyrje është kriminale dhe shoh se aksioni banditesk po udhëhiqet nga një kriminel, si Ardi Veliu, që ka zaptuar forcërisht ambientet e News24. Ardi Veliu, njeriu që mbahet mend vetëm për lidhjet e tij me krimin e organizuar dhe që ka me mijëra faqe transkripte në SPAK që provojnë se është shërbëtor i bandave.
I bëj thirrje SPAK të veprojë menjëherë jo vetëm ndaj këtij krimineli recidivist, që prej kohësh duhet të ishte në burg, por edhe ndaj këtij sulmi të paprecedentë ndaj medias së lirë. Është detyrë e çdo institucioni të pavarur ligjzbatues që të ndalë dhunën brutale ndaj një lirie të shenjtë, siç është liria e medias. Veproni sot ose nesër do jetë shumë vonë!
