Ish-kreu i Shërbimit Informativ Shtetëror, Fatos Klosi, ka analizuar zhvillimet më të fundit politike në vend, duke nisur nga fitorja e katërt radhazi e Partisë Socialiste dhe sfidat që shoqërojnë qeverinë e re në raport me integrimin europian, te kriza e thellë në Partinë Demokratike dhe akuzat që rëndojnë mbi ish-kryeministrin Sali Berisha. Z.Klosi shprehet në një intervistë për gazetën “SOT” se opozita nuk ka më as besimin e vetvetes për protestat që paralajmëron, ndërsa për çështjen e Remzi Hoxhës bën përgjegjës SHIK-un e asaj kohe, të drejtuar, sipas tij, direkt nga Presidenti Berisha. Ai nënvizon se drejtësia duhet të trajtojë me seriozitet të gjitha dosjet e pazgjidhura, përfshirë ato të 21 Janarit dhe Gërdecit, dhe se procesi ndaj Berishës për “Partizanin” është vetëm një nga shumë çështjet që duhen hetuar.
-Zoti Klosi, si e shikoni faktin që Partia Socialiste arriti të fitojë për të katërtën herë radhazi qeverisjen? Çfarë fshihet pas kësaj fitoreje të thellë dhe të pazakontë në tranzicionin shqiptar?
Po, është hera e parë që mandati qeverisës i një partie zgjat kaq shumë. Sigurisht, janë shumë faktorë që çuan në këtë situatë. Ndër kryesorët, sipas meje, është fakti që me ndryshimet kushtetuese të vitit 2008, u vendos sistemi politik pothuaj dypartiak, që i bën zgjedhjet politike një garë vetëm midis dy partive të mëdha. Këtë herë, nga njëra anë ishte PS dhe në anën tjetër PD me aleatët e saj. Përtej kësaj dysheje, pak pretendente të rinj, por me një perspektivë pothuaj të paracaktuar. Dhe këtë përballje natyrshëm nuk mund ta fitonte PD, nëse kemi parasysh situatën në të cilën është katandisur. Ajo që mund të diskutohet është vetëm diferenca e madhe midis tyre. Ka një opinion që në Shqipëri është votuar më shumë “kundër” sesa “pro”, por këtë radhë vetëm vota kundër nuk mjaftoi. PS dha më shumë garanci për një të ardhme më të mirë, sidomos për afrimin me BE. Nga ana tjetër, PD ndërtoi një fushatë kundër, si gjithmonë, pa ofruar alternativë.
Besoj se premtimi është i realizueshëm. Kryeministri ka një plan të detajuar për këtë qëllim. Janë dy faktorë që ndihmojnë: së pari, qeveria është angazhuar seriozisht për t’i përmbushur detyrimet deri në vitin 2027; së dyti, partnerët europianë janë bërë më realistë për nevojën e afrimit të rajonit me BE, sidomos në këtë kontekst gjeopolitik.
-Ka një perceptim në rritje për kontrollin e pushteteve nga një dorë e vetme – si e vlerësoni ndikimin e gjatë të Edi Ramës në demokracinë shqiptare dhe a ekziston rreziku i autokracisë?
Ndikimi i gjatë i Ramës ndjehet në mënyrën e qeverisjes dhe jo aq në demokracinë shqiptare – janë dy gjëra të ndryshme. Shqipëria është një vend i vogël, me mundësi të kufizuara, dhe i mbetur pas nga historia në shumë aspekte të demokracisë. Në vetëm 30 vite nuk mund të presim demokraci si në Europë. Ne kemi vuajtur më shumë nga mungesa e seriozitetit të shtetit sesa nga mungesa e demokracisë. Nuk po e justifikoj autokracinë, por them se ka nevojë për forcimin e shtetit ligjor. Shpresoj që Kryeministri këtë po kërkon të bëjë.
-Ish-kryeministri Sali Berisha ndodhet nën akuzë për aferën “Partizani”. A mendoni se është i përfshirë realisht në këtë çështje apo është një proces i motivuar politikisht?
Akuza për aferën “Partizani” është më e vogla që mund t’i bëhet ish-kryeministrit. Janë afera të tjera më të rënda që duhen trajtuar nga SPAK. Uroj që kjo të bëhet me seriozitet, në zbatim të ligjit dhe jo të politikës.
-A duhet drejtësia të hapë edhe dosje të tjera që lidhen me periudhën e qeverisjes së Berishës, si 21 Janari dhe Gërdeci? A po shmangen këto çështje me qëllim?
Asgjë nuk duhet shmangur me qëllim. Populli për këtë aspekt mbështeti reformën në drejtësi dhe pret që të gjitha ngjarjet e rënda të trajtohen me drejtësi.
-Çfarë dini konkretisht për çështjen e rrëmbimit dhe zhdukjes së Remzi Hoxhës? A është Sali Berisha dhe SHIK-u i kohës përgjegjës për atë ngjarje tragjike?
Di që ai u zhduk nga SHIK-u i kohës, që komandohej direkt nga Presidenti.
-Prej më shumë se një dekade, Partia Demokratike nuk po arrin të vijë në pushtet. Çfarë po e pengon këtë forcë politike të rikthehet si alternativë reale?
Sipas meje, Partia Demokratike edhe kur ka qenë në pushtet nuk ka qenë forcë serioze qeverisëse. Historia e saj tregon për krizë lidershipi dhe mungesë vizioni. Fatkeqësia është se grupi drejtues nuk bën dot pa Kryetarin dhe të rinjtë s’kanë forcë për të ndryshuar partinë.
-Sali Berisha ka paralajmëruar protesta masive në shtator, duke akuzuar qeverinë për vjedhje të zgjedhjeve të 11 majit. A mendoni se këto thirrje do të kenë ndikim real apo janë vetëm retorikë politike?
Përrallën e protestave e dëgjojmë prej shumë kohësh. As vetë Berisha nuk i beson më.
-Në kontekstin e problemeve ligjore që përballet Berisha dhe izolimit të tij ndërkombëtar, a ka më kredibilitet politik për të udhëhequr opozitën shqiptare?
Në gjendjen e sotme ku ndodhet PD, nuk i ka mbetur më asnjë mundësi reale për të udhëhequr një opozitë të suksesshme.
Intervistoi: Rigels Seliman
