Analisti Artan Hoxha shprehet skeptik për dosjen e Prokurorisë së Posaçme në drejtim të kryetarit të bashkisë së Tiranës Erjon Veliaj. Sipas tij, materiali fillestar i paraqitur prej SPAK-ut, nuk ishte mbushamendës.
Ndërkohë për Hoxhën, edhe mbrojtja e Veliajt ka qenë jo këmbëngulëse dhe është treguar e dobët në raport me rrëzimin e argumentave të Prokurorisë së Posaçme.
“Unë mendoj që Veliajn do ta shohim në dy aspekte: në raportin e tij me sistemin e drejtësisë dhe në raportin e tij politik. Këto dyja duhen parë së bashku. Duke i ndarë dhe duke i bashkuar, sepse janë dhe të pandarshme. Atë që pamë në rastin Veliaj është se SPAK i ka qëndruar hipotezës fillestare, në llojet e veprave penale të pretenduara. Mua ai material fillestar i SPAK-ut nuk ma ka mbushur mendjen, që është plotësuar dyshimi i arsyeshëm për veprat e korrupsionit pasiv kombinuar me korrupsionin aktiv të atyre që kanë dhënë, sipas SPAK-ut, para. Ai material jo bindës, nga një anë, nuk është rrëzuar me një temporitëm dhe këmbëngulje nga ekipi i Veliajt. Kur krahasoj se si dilnin në mënyrë sistematike avoketët e zotit Berisha, me shumë siguri dhe me kundër argumenta ndaj argumentave të SPAK-ut dhe shoh edhe se si kanë reaguar avoketërit e zotit Veliaj, shoh edhe këtu dobësi”, u shpreh Hoxha, i ftuar në “Debat nga Alba Alishani” në ekranin e A2CNN.