Genc Synaj tregon për emisionin “Stop” në Tv Klan se i kanë sekuestruar telefonin në policinë e Shkodrës sepse disa persona e kishin kallëzuar se administronte një faqe në Tik Tok dhe shpifte për ta.
Prokuroria u shpreh se nuk kemi të bëjmë me vepër penale dhe vendosi të mos fillojë procedim për rastin. Organi i akuzës gjithashtu vendosi kthimin e telefonit, por kjo nuk ka ndodhur që nga fillimi i nëntorit 2024. Genci thotë se ka bërë ankesë dhe i kanë thënë se OPGJ ka bërë kërkesë në Institutin e Policisë Shkencore.
Këtë radhë bashkë me qytetarin, edhe gazetari i “Stop” bën një kërkesë në Drejtorinë e Përgjithshme të Policisë së Shtetit për kthimin e telefonit. Vetëm pak ditë pas kërkesës së “Stop”, qytetari merr telefonin e tij për të cilin sorollatej prej gati 4 muajsh.
Genc Synaj: Unë sapo u paraqita para shumë pak minutash te Drejtoria Vendore e Policisë Shkodër dhe telefonin e mora. Falënderoj ”Stop”-in jashtë mase për punën e bërë ndaj meje!
