Sekretari i Përgjithshëm i Këshillit të Ministrave, Ëngjëll Agaçi, ka kryer një ndërhyrje emergjente kirurgjikale, e cila përfundoi me sukses dhe po i nënshtrohet rekuperimit shëndetësor. Burime nga Kryeministria kanë konfirmuar për “Javanews” se Agaçi është detyruar 3 javë më parë të kryente një vizitë shëndetësore në Itali, për shkak të disa problemeve të papritura shëndetësore.
“Tre javë më parë, gjatë një udhëtimi privat në Itali, Sekretari i Përgjithshëm i Këshillit të Ministrave u desh të kryente një vizitë shëndetësore për shkak të disa simptomave të papritura dhe menjëherë më pas t’i nënshtrohej një ndërhyrjeje kirurgjikale emergjente, e cila përfundoi me sukses,” bëjnë të ditura burime nga Kryeministria.
Ndërkaq, bëhet e ditur se përgjegjësitë e lidhura me detyrën e Sekretarit të Përgjithshëm të Këshillit të Ministrave janë deleguar në përputhje të plotë me ligjin.
“Teksa faza emergjente tashmë ka përfunduar, do të duhet kohë e nevojshme për të patur një rikuperim të plotë dhe rikthim në detyrë. Në ndërkohë, përgjegjësitë e lidhura me detyrën e Sekretarit të Përgjithshem janë deleguar në përputhje të plotë me ligjin,” thuhet në reagim.