Shqipëria ra dakord të hënën t’u sigurojë strehim të përkohshëm mijëra emigrantëve që arrijnë në brigjet italiane ndërsa kërkesat e tyre për azil do të jenë në shqyrtim, duke i ofruar fqinjit të saj përtej detit Adriatik lehtësim në menaxhimin e fluksit të emigrantëve.
Nisma novatore u njoftua pas takimit të kryeministres italiane Giorgia Meloni në Romë me kryeministrin shqiptar Edi Rama.
Italia do të paguajë për ndërtimin e dy qendrave në Shqipëri që mund të mbajnë deri në 3000 emigrantë në të njëjtën kohë, sipas marrëveshjes. Fëmijët dhe gratë shtatzëna do të përjashtohen nga plani i azilit. Nëse Italia refuzon ofertat për azil, Shqipëria do t’i deportonte emigrantët. Shqipëria do të garantojë gjithashtu siguri të jashtme për dy qendrat, të cilat do të jenë nën juridiksionin italian, u tha Meloni gazetarëve.
Meloni tha se nëse kërkesat për azil trajtohen me shpejtësi, deri në 36,000 emigrantë mund të dërgohen në territorin shqiptar çdo vit. Kjo mund të ndihmojë në lehtësimin e mbipopullimit kronik në qendrat fillestare të përpunimit të azilit në Itali, ku gjatë viteve të fundit, qindra mijëra emigrantë kanë zbarkuar pasi kanë bërë udhëtime të rrezikshme detare nëpër Mesdhe nga Libia, Tunizia, Turqia dhe vende të tjera.
Italia ka kërkuar më shumë solidaritet, por më kot, nga vendet e tjera të Bashkimit Evropian, për ta ndihmuar atë të përballojë numrin e madh të emigrantëve. Të hënën Italia iu drejtua Shqipërisë, e cila shpreson t’i bashkohet bllokut.
Meloni i shprehu mirënjohje Ramës për ndihmën e ofruar. Shqipëria “është jo vetëm një mike e Italisë, por edhe një mike e Bashkimit Europian”, u tha ajo gazetarëve ndërsa ishte e shoqëruar nga kryeministri shqiptar. Shqipëria sillet sikur të jetë një nga vendet anëtare të BE-së, shtoi Meloni.
Italia është një nxitëse e madhe e përpjekjes së Shqipërisë për t’u anëtarësuar në Bashkimin Evropian.
Rama nga ana e tij shprehu mirënjohjen në emër të shqiptarëve që gjetën strehim në Itali dhe “i shpëtuan ferrit dhe imagjinuan një jetë më të mirë”. Ishte referencë për një fluks të shqiptarëve në Itali në fillim të viteve 1990.
Artikulli në origjinal:
https://apnews.com/article/italy-albania-migrants-asylum-5028fe39f6fe978d4018f3e734dda7f0
/Përgatiti: Liberale.al/
