Ish-oficeri i policisë amerikane Derek Chauvin, i cili është dënuar për vrasjen e afrikano-amerikanit George Floyd, u sulmua me thikë nga një koleg i burgosur dhe po merr mjekimin në burgun federal në Arizona, në jugperëndim të Shteteve të Bashkuara, sipas New York Times.
Derek Chauvin “u godit me thikë të premten në një burg federal në Tucson, Arizona, sipas dy personave me njohuri për rastin,” raportoi gazeta.
Shërbimet Federale Korrektuese të SHBA-së konfirmuan për AFP se kishte pasur “një sulm”, por nuk specifikuan emrin e viktimës.
Stafi i burgut “mori masa për të shpëtuar jetën e një të burgosuri” dhe u kërkua ndihma e shërbimeve mjekësore, shtuan ata. I burgosuri u dërgua “në një spital lokal për të marrë kujdes dhe për t’iu nënshtruar analizave,” përfunduan ata.
Më 25 maj 2020, Chauvin, në atë kohë një anëtar i Departamentit të Policisë së Minneapolis, arrestoi Floyd-in, ia mbështeti fytyrën në tokë dhe ia mbajti gjurin e tij në qafë për gati 10 minuta, pavarësisht ankesave të burrit afrikano-amerikan se nuk merrte dot frymë.
Dy oficerë të tjerë ndihmuan Chauvin-in të mbante Floyd poshtë. Skena u filmua dhe u postua në rrjetet sociale, duke shkaktuar një protestë si në SHBA dhe më gjerë kundër racizmit dhe brutalitetit të policisë.
Chauvin u shpall fajtor për vrasje nga pakujdesia në vitin 2021 dhe u dënua me 22 vjet e gjashtë muaj burg. Gjykata e Lartë e SHBA-së hodhi poshtë javën e kaluar apelimin kundër dënimit të tij.
Ai u deklarua fajtor për “shkeljen e të drejtave civile” të Floyd në gjykatën federale në vitin 2022 dhe u dënua me 21 vjet burg./Liberale.al
