Armëpushimi i planifikuar midis Izraelit dhe Hamasit do të zgjasë deri në 10 ditë, gjatë së cilës deri në 300 të burgosur palestinezë në Izrael do të shkëmbehen me deri në 100 pengje të Hamasit, sipas informacioneve të sotme në gazetën Times of Israel, duke cituar kabinetin izraelit. Pas kësaj, luftimet në Rripin e Gazës pritet të vazhdojnë, tha gazeta.
Uebsajti izraelit i lajmeve Ynet raportoi gjithashtu se Izraeli planifikon t’i japë Hamasit emrat e pengjeve. Marrëveshja thuhet gjithashtu se parashikon që nënat që janë marrë peng nga persona të armatosur të Hamasit nuk do të ndahen nga fëmijët e tyre pas lirimit të tyre.
Sipas raportit të “Times of Israel”, pengjet duhet të jenë shtetas izraelitë ose banorë të vendit. Nuk është bërë e ditur se kush është saktësisht në këtë kategori.
Në fazën e parë, Izraeli planifikon të lirojë 150 të burgosur palestinezë pasi të lirohen 50 pengje nga Hamaso. Lirimi do të bëhet me faza brenda një periudhe katër-ditore, gjatë së cilës të paktën 10 pengje do të lirohen çdo ditë.
Në fazën e dytë, deri në 150 të burgosur palestinezë do të lirohen nga burgjet izraelite – me kusht që, në këmbim, deri në 50 pengje të kthehen në Izrael. Përsëri, të paktën 10 pengje duhet të lirohen në çdo fazë. Sipas raportit të gazetës izraelite, një armëpushim tjetër 24-orësh do të respektohet për çdo 10 pengje të liruar./Liberale.al
