Një ditë më parë kryeministri Edi Rama ka njoftuar se samiti i NATO-s nuk do të zhvillohet në 2027. Sot Agjencia për Media dhe Informim sqaron se vendimi për organizimin e samitit të ardhshëm të NATO-s në Tiranë mbetet i pandryshuar.
Përmes një postimi në rrjetet sociale, MIA thekson se deklarata e kryeministrit një ditë më parë kishte të bënte vetëm me kohën e zhvillimit të samitit dhe jo me anulimin apo ndryshimin e vendimit që Shqipëria të jetë vendi pritës.
“Kryeministri Edi Rama ka deklaruar se samiti i ardhshëm i NATO-s do të zhvillohet në Tiranë. Ky vendim mbetet i pandryshuar. Sa i përket vitit dhe datës së zhvillimit të samitit, ato përcaktohen përmes vendimmarrjes së përbashkët të vendeve aleate në Këshillin e Atlantikut të Veriut”, sqaroi MIA.
“Deklarata e djeshme e Kryeministrit është një sqarim mbi kohën e zhvillimit të Samitit dhe jo një përgënjeshtrim i vendimit për organizimin e tij në Shqipëri. Tirana si vend pritës është e konfirmuar. Koha e zhvillimit përcaktohet nga vetë Aleanca”, përfundoi Agjencia për Media dhe Informim.
Një ditë më parë, nga Dublini, ku ndodhej në prag të takimit të liderëve europianë, Rama u shpreh se samiti nuk do të zhvillohet në vitin 2027, ndërsa theksoi se Shqipëria ta organizojë atë një vit më vonë.
“Shqipëria projektohet si mikpritësja e ardhshme e samitit të NATO-s. Çështja është që nuk është arritur një qëndrim i përbashkët se kur do të zhvillohet samiti. Është e sigurtë jo në 2027. Në 2028 nëse do të ketë një samit, do të zhvillohet në Tiranë dhe kjo s’ka asnjë dyshim dhe gjithçka që thuhet pastaj rreth kësaj, janë të gjitha gjepura”, tha Rama.