Hakerët kanë hyrë në sistemin e email-eve të Dhomës së Deputetëve në Itali dhe kanë lexuar mesazhet e të paktën tre politikanëve: kryeministres Giorgia Meloni, Andrea Delmastro-s nga partia Vëllezërit e Italisë dhe Paolo Formentini-t nga Lega.
Ndërhyrja është zbuluar nga ekspertët e Agjencisë Kombëtare për Sigurinë Kibernetike, të cilët po punojnë në Montecitorio për të siguruar sistemin dhe për të zbuluar origjinën e sulmit, raporton La Repubblica.
Sipas ekspertëve, mënyra se si është kryer ndërhyrja dhe zgjedhja e personave të prekur ngrenë dyshime për një sulm të synuar. Megjithatë, email-i zyrtar i Melonit në Kryeministri besohet se nuk është prekur, pasi mbrohet nga sisteme më të avancuara sigurie.
Hetuesit po shqyrtojnë edhe mundësinë që sulmi të jetë pjesë e një strategjie të luftës hibride, e cila ka shënjestruar më parë edhe sistemet informatike të parlamenteve të tjera evropiane.
Për momentin, nuk dihet se nga ka ardhur sulmi dhe sa e gjerë ka qenë ndërhyrja.
Nga Dhoma e Deputetëve deklarojnë se sistemi ka qëndruar funksional dhe se verifikimet vijojnë. Sipas institucioneve, janë marrë masa mbrojtëse në bashkëpunim me Agjencinë Kombëtare për Sigurinë Kibernetike.