Pamje të rënda janë regjistruar brenda një kishe në rajonin e Karakut, në Jordani, gjatë një sulmi të armatosur që la shtatë persona të vrarë dhe të paktën 34 të plagosur, disa prej tyre në gjendje të rëndë.
Në videot e publikuara shihet paniku mes besimtarëve, të cilët përpiqen të largohen dhe të gjejnë strehim sapo dëgjohen të shtënat e para. Në pamje, të paktën një person duket se rrëzohet pasi qëllohet me armë, ndërsa persona të armatosur shfaqen në zonë.
Sipas autoriteteve jordaneze, dy persona të armatosur, së bashku me një person të tretë, zbritën nga një automjet dhe hapën zjarr gjatë një funerali në fshatin Hamoud, në provincën e Karakut.
“Të paktën shtatë persona u vranë në një sulm me armë zjarri në kishën ortodokse greke në fshatin Hamoud, në provincën Karak”, thuhet në deklaratën e Drejtorisë së Sigurisë Publike.
Një dëshmitar okular i tha televizionit Al-Mamlaka se autorët qëlluan për rreth pesë minuta përpara se të largoheshin. Sipas tij, në momentin e sulmit, brenda dhe jashtë kishës ndodheshin 150 deri në 200 persona. Shumica e viktimave ishin të moshës 50 deri në 70 vjeç.
Autoritetet kanë nisur hetimet për identifikimin e autorëve.
Rajoni i Karakut, me një popullsi prej rreth 375 000 banorësh, është shtëpia e një komuniteti të madh të krishterë. Sulmet e tilla të dhunshme janë të pazakonta në Jordani, megjithëse janë regjistruar edhe më parë ngjarje të përgjakshme.
The post Pamje të rënda, momentet e sulmit të armatosur në një kishë në Jordani, 7 të vrarë dhe 34 të plagosur (VIDEO) appeared first on Euronews Albania.
Burimi: Botë