Qeveria italiane do të dërgojë 500 ushtarë në Milano, pas protestave kundër kostos së lartë të jetesës që përfunduan në përplasje me policinë, vandalizëm dhe grabitje. Ekzekutivi i drejtuar nga Giorgia Meloni po shqyrton gjithashtu masa më të rrepta sigurie, përfshirë zgjerimin e ndalimit parandalues për të miturit dhe goditjen e grupeve të dhunshme të të rinjve.
Vendimi vjen pas trazirave të së shtunës dhe të dielës, kur grupe protestuesish me fytyra të mbuluara dogjën kosha mbeturinash, dëmtuan vitrina dhe plaçkitën dyqane, përfshirë në zonën përreth Duomos, një prej pikave më të njohura të Milanos.
Sipas autoriteteve italiane, policia ndaloi 271 të rinj pas incidenteve. Prej tyre, 32 persona u arrestuan, përfshirë 23 të mitur dhe 13 shtetas të huaj, ndërsa 28 të tjerë u raportuan pranë autoriteteve gjyqësore. Policia përdori gaz lotsjellës dhe ujë me presion për të shpërndarë grupet e dhunshme, të cilat u shkëputën nga një protestë që fillimisht ishte paqësore.
Ministria e Brendshme dhe qeveria po përgatiten për masa të reja, ndërsa në Milano priten demonstrata të tjera të shtunën.
Ministri i Jashtëm dhe zëvendëskryeministri Antonio Tajani deklaroi se qeveria do të reagojë me vendosmëri ndaj akteve të dhunës.
“Qeveria do t’u përgjigjet me vendosmëri këtyre sulmeve ndaj shtetit, përfshirë përmes masave që synojnë frenimin e dhunës nga të miturit”, u shpreh Tajani, pas një takimi të zhvilluar të hënën, të drejtuar nga kryeministrja Meloni me zyrtarët më të lartë të sigurisë.
Pas incidenteve, disa prej dyqaneve luksoze në zonën e modës në Milano kanë qëndruar të mbyllura, nga frika e përshkallëzimit të mëtejshëm të situatës. Marka të njohura, si Chanel, Tiffany dhe Dior, kanë larguar produktet nga vitrinat si masë paraprake.
Ndër masat që po shqyrtohen nga qeveria është edhe ashpërsimi i ndëshkimeve për bllokimin e rrugëve. Kjo nismë vjen pas disa ditësh protestash në jug të Italisë nga drejtuesit e kamionëve, të cilët kanë kundërshtuar çmimet e larta të karburanteve.
Milano po përgatitet për demonstrata të tjera të shtunën, pas shfaqjes në rrjetet sociale të një lëvizjeje të re, të quajtur “17 Tetori”. Grupi ka bërë thirrje për protesta në Milano dhe qytete të tjera të mëdha italiane çdo të shtunë pasdite, deri në rrëzimin e qeverisë aktuale.
“Ju jeni të dhunshmit. Ju, që na mohuat një të ardhme. Tani, ne po e kërkojmë vetë atë të ardhme”, thuhet në mesazhin e publikuar nga lëvizja.
Protestat kanë nxjerrë në pah pakënaqësinë për rritjen e kostos së jetesës, ndërsa tensione janë regjistruar edhe në qytete të tjera të veriut të Italisë, përfshirë Bolonjën, Breshian, Bergamon dhe Torinon.
Opozita italiane e akuzon shpesh qeverinë Meloni se e përdor sigurinë si mjet propagandistik, pa adresuar sa duhet problemet themelore që lidhen me arsimin, strehimin dhe kushtet e jetesës në zonat e margjinalizuara.
Burimi: Lajme ndërkombëtare