Deputeti socialist Erion Braçe kërkon që kandidati i Partisë Socialiste për Bashkinë e Tiranës të zgjidhet përmes një gare reale dhe një votimi masiv brenda partisë.
Në një intervistë në emisionin “Të Paekspozuarit” në Vizion Plus, Braçe theksoi se ka kërkuar që të gjithë ata që synojnë të drejtojnë kryeqytetin të kenë mundësinë të përballen në një garë, ku vendimin përfundimtar ta marrin votuesit.
Braçe sqaroi gjithashtu se nuk ka komunikuar me kryeministrin Edi Rama për këtë çështje, duke theksuar se përzgjedhja e kandidatit nuk është një çështje personale, por i takon strukturave drejtuese të Partisë Socialiste.
Pjesë nga intervista:
Braçe: Kam kërkuar garë brenda PS-së. Kam kërkuar të thirren me një votim masiv për të zgjedhur me vota kandidatin për Bashkinë e Tiranës.
Rakipi: Pra, po kërkon primare?
Braçe: Unë dua një garë reale, përmes votës së njerëzve që duan t’i drejtojnë. Unë s’kam kërkuar që të mblidhet kryesia dhe të dalë Rama të thotë: “Braçe është kandidati i Bashkisë së Tiranës”. Se dua këtë, edhe nëse ndodh, se dua.
Rakipi: Ke komunikuar me Ramën për këtë?
Braçe: Jo, nuk është muhabet personal. Gara është një çështje e forumeve të PS-së.
Moderatori: Braçe, ju thatë shumë gjëra. Si është gjendja e PS-së sot?
Braçe: Ajo që mua më vlen të them është se unë e kam lirinë të them mendimin tim; a dëgjohet apo jo, kjo është tjetër gjë. Funksionon si kudo. Ajo që mua më dhemb është që një pjesë e institucioneve që janë krijuar me votë janë atrofizuar. A kishte temë më të madhe që të mblidheshin Asambleja dhe grupi parlamentar sesa kjo reformë? Unë mendoj se temë më të rëndësishme se kjo nuk mund të kishte.
Si shpjegohet që Kryesia nuk u mblodh asnjëherë, Asambleja po ashtu, kur janë krijuar me votë këto institucione? Si shpjegohet që grupi parlamentar i PS-së, edhe pse u mblodh katër herë me qeverinë, nuk foli asnjëherë për këtë temë?
Ajo që mua më shqetëson është pikërisht kjo: mënyra se si marrim vendimet. Kemi humbur sensin e diskutimit brenda vetes. Ne po marrim vendime për të ardhmen e fëmijëve, por pa i pyetur ata. Marrim vendime për atë që do të ndodhë pas 15 vitesh, pa pyetur të rinjtë. PS-ja duhet të largohet sa më parë nga marrja e vendimeve përmes njoftimeve.
Burimi: Politika