Takimi special në burgun e Drenovës në Korçë, mes të dënuarit përjetë Laert Haxhiu dhe modeles kosovare Ziza Pajaziti mori vëmendjen mediatike vitin e kaluar. Pas këtij takimi, nisën hetimet penale ndaj ish-drejtorit të burgut Drenovë, Fatjon Fasho, dhe ish-shefit të policisë së këtij burgu, Sokol Kaçoli për “Shpërdorim detyre”.
Por një hetim i kryer nga Prokuria e Korçës ka zbuluar se i burgosuri dhe modelja kanë një kontratë bashkëjetese me njëri-tjetrin. Sipas gazetarit Elton Qyno, marrëveshja është firmosur me 6 tetor 2025 pranë pranë noterit publik, Bledar Zake në Korçë, tre muaj pas takimit fillestar në Burgun e Drenovës.
Gazetari raporton se Haxhiu e ka firmosur marrëveshjen në burgun e Drenovës, ndërsa Pajaziti pranë noterit publik. Po ashtu edhe Komisariati i Policisë Lushnjë, ka konfirmuar se Ziza Pajaziti dhe Laert Haxhiu, kanë bashkëjetuar së bashku, gjatë kohës që ky i fundit ishte në kërkim policor.
Mësohet se marrëveshjen e ka dorëzuar avokati në drejtorinë e burgut të Drenovës, ndërsa më pas, drejtori i këtij institucioni të vuajtjes së dënimit, e ka dërguar në Prokurorinë e Korçës.
Ndërkohë gazetari Qyno ka bërë publike dhe detaje nga kontrata e marrëveshjes, ku theksohet se Laert Haxhiu dhe Ziza Pajazti, e kanë lidhur kontratët e bashkëjetesës për të rregulluar pasojat që rrjedhin nga bashkëjetesa e tyre.
Po ashtu në dokument nënvizohet se pasuritë e bëra gjatë kohës së bashkëjetesës, konsiderohen pasuri personale e secilit bashkëjetues dhe pala tjetër nuk gëzon të drejta në lidhje me këto pasuri.
Kujtojmë që Lert Haxhiu është shpallur fajtor për ngjarjen e regjistruar në Lushnje në vitin 2017, prej ku mbetën të vrarë Zamir Latifi dhe Jurgen Hoxha, kurse të plagosur Maius Xhepexhiu dhe Bujar Turku. Për të njëjtën ngjarje janë dënuar po me burgim të përjetshëm Orgest Bilbili dhe Anterio Kaloshi.
Mbi ta rëndojnë akuzat e veprave penale “Vrasje në rrethana cilësuese të një ose më shumë personave”, “Kryerja e veprave penale në kuadër të grupit kriminal”, “Mbajtja pa leje dhe prodhimi i armëve, armëve shpërthyese dhe i municionit”, si dhe “Prishja e qetësisë publike”.
