Policia ka dhënë detajet e para për vrasjen e dyfishtë që ka ndodhur pasditen e së dielës në Dukagjin të Shkodrës. Sipas njoftimit zyrtar, rreth orës 17:20, në fshatin Mgull, Njësia Administrative Pult, janë vrarë me armë zjarri dy persona, babë e bir.
Viktimat janë Lekë Gjoni dhe Prel Gjoni. Nga të shtënat ka mbetur i plagosur rëndë Lazer Bashi. Të dhënat paraprake ngrenë hipotezën se mund të bëhet fjalë për gjakmarrje, por rrethanat mbeten ende të paqarta.
Sipas Policisë së Shkodrës, hetuesit do të punojnë për zbardhjen e rrethanave, dokumentimin ligjor të ngjarjes dhe identifikimin e kapjen e autorit ose autorëve.
“Rreth orës 17:20, në fshatin Mgull, Njësia Administrative Pult, Dukagjin, dyshohet se janë vrarë me armë zjarri shtetasit L. Gj. dhe P. Gj., babë e bir, si dhe është plagosur rëndë shtetasi L.B.
Forca të shumta të Policisë Vendore dhe të Forcës Kombëtare të Sigurisë, Njësia Shkodër, janë nisur drejt vendngjarjes.
Ndërkohë, është ngritur një grup i posaçëm hetimor, i cili po shkon në vendngjarje, për zbardhjen e plotë të rrethanave, dokumentimin ligjor të ngjarjes, si dhe identifikimin dhe kapjen e autorit/autorëve.”-njofton policia.
