Vuçiç ka reaguar ndaj qëndrimit të Shqipërisë lidhur me deklaratat e tij për lumin Ibër, duke pretenduar se Tirana nuk ka lidhje me këtë çështje.
Presidenti i Serbisë, Aleksandar Vuçiç, i është përgjigjur qëndrimit të Shqipërisë lidhur me deklaratat e tij për mundësinë e ndryshimit të rrjedhës së lumit Ibër, duke pretenduar se Tirana nuk ka lidhje me këtë çështje.
Gjatë një interviste për televizionin publik serb RTS, Vuçiç kundërshtoi reagimet ndaj deklaratave të tij dhe e cilësoi çështjen e Ibrit si një problem të brendshëm të Serbisë.
“Çfarë tjetër duhet të bëjnë? Çfarëdo që të thuash, do t’i drejtohen Brukselit, meqë nuk dinë më çfarë të bëjnë me veten. Serbët torturohen dhe keqtrajtohen atje. Nuk e di çfarë lidhje ka me Shqipërinë. Çfarë lidhje ka Ibri me Shqipërinë? Çfarë lidhje ka kjo me ndonjërin prej tyre në ndonjë mënyrë? Kjo është çështja jonë e brendshme”, deklaroi Vuçiç.
Presidenti serb tha se deklarata e tij për ngritjen e një grupi pune lidhet me situatën në Ribariç dhe me shqyrtimin e problemeve që, sipas tij, ekzistojnë në atë zonë.
“Nuk ka ndonjë filozofi të madhe këtu”, tha Vuçiç, ndërsa më pas e zhvendosi deklaratën te Kosova dhe përsëriti akuzat e tij ndaj autoriteteve në Prishtinë.
Ai pretendoi se serbët në Kosovë përballen me arrestime, dhunë dhe presion institucional, ndërsa akuzoi edhe faktorët ndërkombëtarë se po mbështesin forcimin e institucioneve të Kosovës dhe dobësimin e strukturave serbe.
Vuçiç u kthye edhe te ndërhyrja e NATO-s kundër Jugosllavisë në vitin 1999. Sipas tij, 19 vendet e Aleancës ndërhynë me synimin për t’i shkëputur Serbisë Kosovën.
“Edhe 18 vjet pas shpalljes së pavarësisë nga Prishtina, shpalljet e tyre ende nuk njihen nga Serbia dhe shumë vende në botë”, deklaroi presidenti serb.
Vuçiç akuzoi më tej vendet perëndimore se me mbështetjen e pavarësisë së Kosovës kanë krijuar një precedent që, sipas tij, ka prodhuar pasoja edhe për zhvillimet e mëvonshme në Evropën Lindore.
“Mendoj se ata e kanë hapur kutinë e Pandorës në Evropë dhe mendoj se janë fajtorë për atë që po ndodh sot në Evropën Lindore dhe për shumë gjëra të tjera, sepse sapo të hapësh një kuti të tillë, nuk ka kthim prapa”, tha ai.
Pavarësisht retorikës ndaj Prishtinës dhe faktorit ndërkombëtar, Vuçiç deklaroi se Serbia duhet të veprojë me “durim, përgjegjësi dhe zgjuarsi” dhe të mos ndërmarrë veprime të nxituara.
Në të njëjtën intervistë, presidenti serb u ndal edhe te vendimi i KFOR-it për të zvogëluar praninë e përhershme në urën mbi Ibër në Mitrovicë.
Vuçiç njoftoi se gjatë mbrëmjes do të bisedojë me shefin e Shtabit të Përgjithshëm të Ushtrisë Serbe, gjeneralin Milan Mojsiloviç, pikërisht për zhvillimet rreth urës dhe vendimin e misionit të NATO-s në Kosovë.
Sipas tij, Mojsiloviç ka komunikuar edhe me komandantin e KFOR-it për këtë dhe çështje të tjera të sigurisë.
“Meqenëse donin të lironin urën mbi Ibër në Mitrovicë dhe për këtë arsye pasoi ndërhyrja jonë, diçka e tillë nuk duhet të lejohet. Për mua asgjë nga kjo nuk është e papritur”, deklaroi Vuçiç.
Presidenti serb komentoi edhe ndryshimet e masave të sigurisë në Manastirin e Deçanit, të cilat lidhen me vlerësimin e KFOR-it për përmirësimin e situatës së sigurisë.
Vuçiç i kundërshtoi këto zhvillime dhe i vendosi ato në të njëjtën linjë me akuzat e tij ndaj institucioneve të Kosovës dhe faktorit ndërkombëtar.
Kështu, reagimi i nisur me pyetjen “Çfarë lidhje ka Ibri me Shqipërinë?” përfundoi te paralajmërimi se Beogradi po ndjek nga afër lëvizjet e KFOR-it në veri të Kosovës dhe se Vuçiç do ta diskutojë situatën drejtpërdrejt me drejtuesin më të lartë ushtarak të Serbisë. /Pamfleti