Të gjithë pazaret nëpërmjet Korporatës së Investimeve për dhurime trojesh, tokash e lejesh për kulla mbi to, për kompanitë përfituese, masën ndarjes së pjesëve dhe datat e ankandeve, i bën kryeministri Edi Rama, ndërsa dokumentet i firmos drejtoresha Elira Kokona.
Kështu po veprohet për sipërfaqen e truallit publik të Fushës së Aviacionit në Tiranë dhe 2 sipërfaqe trojesh të Stacioneve të Policisë në Himarë e Palasë.
Në Buletinin e Njoftimeve Zyrtare të datës 3 gusht 2026, Korporata e Investimeve Shqiptare ka njoftuar shtyrjen përsëri të ankandeve për këto sipërfaqe trojesh, të cilat kryeministri Edi Rama ka vendosur t’i japë për kulla, hotele e resorte, nëpërmjet sipërmarrjes me privatët.
Me Njoftimin Nr. 334/12, datë 31 korrik 2026, drejtoresha Elira Kokona bën të ditur shtyrjen për herë të tretë të ankandit me objekt: “Projektimi dhe zhvillimi nëpërmjet sipërmarrjes i objektit multifunksional te zona e ish-Fushës së Aviacionit Tiranë”, i cili ishte caktuar më 4 shtator 2026, por do të zhvillohet më 21 shtator.
Sipas vendimit, Fusha e Aviacionit Tiranë me sipërfaqe trualli 7940 m² do t’i jepet privatit për të ndërtuar kulla me sipërfaqe totale ndërtimi 50 mijë m².
Nga kjo sipërfaqe, 32 mijë e 500 m² do t’i marrë privati, ndërsa 17 mijë e 500 m² do të jenë zyra për Avokatin e Popullit, Autoritetin e Konkurrencës, Komisionerin për të Drejtën e Informimit dhe Mbrojtjes së të Dhënave Personale, Komisionerin për Mbikëqyrjen e Shërbimit Civil dhe Komisionin e Prokurimit Publik.
Mirëpo, shtyrja e ankandit mendohet të jetë dakordësi mes Edi Ramës dhe ndërtuesve që privati të përfitojë 75% të sipërfaqes së ndërtimit, ose 5 mijë m² më tepër, pazar të cilin do ta tregojë ankandi i datës 21 shtator 2026, nëse nuk do të shtyhet përsëri.
E njëjta skemë pazari thuhet se qëndron edhe pas Njoftimit Nr. 347/8, datë 31 korrik 2026 të Korporatës së Investimeve, për ankandin e dhënies me sipërmarrje të trojeve publike për projektin: “Zhvillimi i dy strukturave akomoduese në Palasë e Dhërmi”.
Data e zhvillimit të ankandit ishte caktuar në datën 10 shtator, por drejtoresha Elira Kokona, d.m.th., kryeministri Edi Rama, e ka shtyrë për në datën 25 shtator 2026.
Edhe në këtë projekt, qeveria i ka ofruar privatit 5700 m² truall publik në Palasë e Himarë për të ndërtuar 54 mijë e 391 m² sipërfaqe totale, nga të cilat shteti do të marrë 35%, ose 19 mijë e 36 m², për Qendrën Shëndetësore Verore, Policinë e Shtetit, Policinë Kufitare e Shërbimin Zjarrfikës për zonën Palasë-Dhërmi.
Por, siç thuhet, privati nuk është i kënaqur me 65% të sipërfaqes së ndërtimit prej 35 mijë e 354 m² dhe kërkon 75% të sipërfaqes, ose 40 mijë e 793 m².
Të presim dhe të shohim nëse Babloku do t’i pranojë edhe këto dy pazare, sipas sipërfaqeve që kërkojnë ndërtuesit e kullave./Pamfleti