Emërimi i Jola Hysajt në krye të Agjencisë Kombëtare të Turizmit ka shkaktuar debat politik dhe reagime në rrjetet sociale, për shkak të së kaluarës së saj në Partinë Demokratike.
Hysaj, e cila deri pak muaj më parë mbante detyrën e sekretares për Marrëdhëniet me Publikun në PD, dha dorëheqjen nga partia në muajin mars, duke i dhënë fund një angazhimi mbi 20-vjeçar. Tashmë ajo është emëruar në drejtimin e një prej institucioneve kryesore në varësi të qeverisë socialiste.
Pas kritikave dhe akuzave se kishte braktisur të djathtën për një post në administratën e Edi Ramës, Hysaj ka reaguar përmes një mesazhi publik.
Në reagimin e saj, ajo konfirmon emërimin dhe tregon edhe bisedën që, sipas saj, ka zhvilluar me kryeministrin.
“Po jam emëruar drejtore e Agjencisë Kombëtare të Turizmit. Jam shumë falenderuese për besimin dhe uroj ta justifikoj plotësisht.
Po e kam takuar Edi Ramën. Fjala që më mbeti në mend ishte: ‘Nuk dua të bëhesh socialiste, dua të çosh më lart institucionin që ngriti Zana Çela.’
Po jam demokrate, por nuk jam me Partinë Demokratike. Jam me partinë e Shqipërisë turistike.
Gjithkush është i lirë të spekullojë dhe thurrë teori konspirative. Por kush më njeh e di që unë i pres drutë shkurt.
Kaq kisha nga ana ime. Kush do më urojë punë të mbarë e falenderoj! Kush do më shajë dhe mallkojë e ngushëlloj“, shkruan ajo.