Ish-ministri i Jashtëm Ditmir Bushati ka zgjedhur t’i përgjigjet deklaratës së ministres serbe Snezhana Paunoviç me një reagim në rrjetet sociale.
Ashtu si reagime të tjera të ngjashme politike, edhe ky kufizohet në një status publik, duke ushqyer kritikat se patriotizmi ndaj Kosovës po mbetet gjithnjë e më shumë në Facebook, ndërsa mungojnë iniciativa apo angazhime konkrete përtej deklaratave.
Bushati ndjek të njëjtën “recetë” të përdorur shpesh në politikë, sidomos nga Spiropali, shumë zë në rrjete sociale, por pak ndikim përtej tyre.
“E papranueshme dhe e rrezikshme gjuha e ministres së qeverisë serbe që mbështet spastrimin etnik në Kosovë. Një fyerje për viktimat, familjet e tyre dhe drejtësinë. Në Europë nuk ka vend për retorikë që arsyeton dhe mbështet spastrimin etnik. Serbia, si vend kandidat për në BE, nuk duhet të bëjë përjashtim”, u shpreh Bushati.
Deklarata e ministres serbe ka shkaktuar reagime të shumta, pasi ajo deklaroi në një intervistë për median serbe Kurir se, nëse do të kishte qenë e lirë të vepronte si Slobodan Millosheviç, do ta kishte “spastruar etnikisht Kosovën” në vitin 1998. Këto deklarata janë dënuar si një relativizim i krimeve të kryera gjatë luftës në Kosovë dhe kanë nxitur kritika të forta në opinionin publik.