Ditën e sotme zëvendësministri i Bujqësisë, Fatmir Guri, prezantoi në Komisionin e Ligjeve projektligjin “Për Mbrojtjen e Tokës Bujqësore”, e cila parashikon që në fermat agrofotovoltaike të lejohet jo vetëm prodhimi i energjisë nga dielli dhe era, por edhe instalimi i baterive për depozitimin e saj.
Ndryshimet parashikojnë që deri në 40% të sipërfaqes së fermave agrofotovoltaike të përdoret për prodhimin e energjisë, ndërsa një pjesë e kufizuar edhe për bateritë e depozitimit. Opozita dhe deputeti socialist Damian Gjiknuri ngritën shqetësime për ndikimin në tokën bujqësore.
Në fermat agrofotovoltaike nuk do të lejohet vetëm prodhimi i energjisë nga panelet diellore apo turbinat me erë, por edhe instalimi i baterive për depozitimin e energjisë së prodhuar.
Kjo është një nga risitë e projektligjit “Për Mbrojtjen e Tokës Bujqësore”, i cili u diskutua në Komisionin e Ligjeve dhe u shoqërua me debate mes deputetëve.
Gjatë prezantimit të projektligjit, zëvendësministri i Bujqësisë, Fatmir Guri, sqaroi se fermat agrofotovoltaike do të kenë përdorim të kombinuar, ku pjesa më e madhe e sipërfaqes do të vijojë të shfrytëzohet për bujqësi, ndërsa pjesa tjetër për prodhimin dhe depozitimin e energjisë.
“Flasim për ferma të cilat kanë një përdorim të përbashkët që është bujqësor dhe ai i përftimit të energjisë, në të cilat 60% e sipërfaqes është për aktivitete bujqësore dhe 40% e sipërfaqes është për aktivitete të përthithjes së energjisë. Depozitimi ka të bëjë pikërisht me përdorimin e një sipërfaqe relativisht shumë të kufizuar për vendosjen e vendit ku do të vendosen bateritë e asaj ferme agrofotovoltaike. Ajo që ne kemi shtuar këtu është, fakti që përveç vendosjes së paneleve, kemi vendosur edhe që një pjesë shumë e kufizuar e tokës të përdoret për vendosjen e baterisë për depozitimin e kësaj energjie. Licenca e përdorimit ose certifikimi i një ferme të tillë është nën varësinë e Ministrisë së Infrastrukturës”, tha Guri.
Projektligji hasi kundërshtime si nga opozita, ashtu edhe nga një pjesë e deputetëve të mazhorancës. Kritikat u përqendruan te ndikimi që mund të kenë ndërtimet e nevojshme për instalimin e baterive dhe të turbinave eolike mbi tokën bujqësore.
Deputeti socialist Damian Gjiknuri kundërshtoi përfshirjen e energjisë së erës në këtë skemë, duke argumentuar se ndërtimi i turbinave kërkon bazamente të mëdha betoni.
“Të vësh një kullë për Wind Farm dhe sot minimumi i prodhimit është 6 mega, do të thotë është 100 metër e lartë dhe nuk ka shans mos kesh një bazament të madh betoni aty. Se prodhohet ndryshe, nuk ka mundësi. Do të thotë që bëhet fjalë për kulla masive të eolikëve. Për mua s’duhet të futet fare kjo eolikë këtu se flitet për agrofotovoltaik, pastaj futet dhe eolikja. Ngatërrohen me termat dhe mendojnë se janë të gjitha njësoj”, tha Gjiknuri.
Edhe deputeti demokrat Oerd Bylykbashi ngriti shqetësime për ndikimin që do të kenë bateritë në strukturën e tokës.
“Një depozitë ujë 5000 litër të vendosësh, duhet do të bësh platformë betoni, jo më të vesh bateri të cilat mund të jenë sa një kontejner që t’i shërbejnë këtyre fermave fotovoltaike, që do të thotë ai investim që do bëhet atje do ta prishë atë strukturë toke aty”, u shpreh Bylykbashi.
Debatet nuk mbetën vetëm te përmbajtja e projektligjit. Gjatë mbledhjes pati edhe përplasje mes Damian Gjiknurit dhe kryetarit të Komisionit të Ligjeve, Ulsi Manja.
Në votimin në parim, Gjiknuri votoi kundër projektligjit, ndërsa gjatë shqyrtimit nen për nen abstenoi. Më pas ai kërkoi të merrte fjalën për të shpjeguar qëndrimin e tij, por u përball me refuzimin e Manjës, çka solli tension në sallë dhe largimin e deputetit nga mbledhja.
Manja: Na e lini turpin ne e gjetët lepurin në ferrë ju të tre sot (Gjiknuri, Bylykbashi dhe Strazimiri) kush është dakord me projektligjin…?”
Gjiknuri: “Më lër të jap shpjegimin.
Manja: “Jo, jo qëndro tek abstenimi ti.
Gjiknuri: “Do ma japësh fjalën apo të iki fare?
Manja: Po ik more…
Gjiknuri: Muhabet leshi.
Manja: Merru me Oerdin.
Për shkak se nuk u lejua të fliste, Gjiknuri vendosi të largohet nga komisioni, ndërsa nuk munguan replikat me Ulsi Manjën.
Pavarësisht situatës, Komisioni i Ligjeve vijoi diskutimet me pjesëmarrjen e deputetëve të tjerë të mazhorancës socialiste.