Sipas një hulumtimi të mediave publike të vendeve nordike, Rusia po forcon praninë e saj ushtarake përgjatë kufirit me NATO-n. Në pamjet satelitore, të analizuara nga transmetuesit publikë të Suedisë, Norvegjisë, Danimarkës dhe Estonisë, dallohen sipërfaqe pyjore të pastruara, ndërtesa të rrënuara dhe objekte të reja ushtarake në anën ruse të rajonit verior arktik.
Transmetuesi publik danez DR flet në një dokumentar për një të ashtuquajtur “plan lufte për Evropën” dhe ngre dyshime se Rusia mund të jetë duke u përgatitur për një përballje ushtarake me shtetet fqinje përgjatë krahut lindor të NATO-s.
Në Danimarkë, publikimi shkaktoi një debat të ashpër mes ekspertëve të sigurisë, të ndarë mes atyre që e konsiderojnë paralajmërimin të justifikuar dhe kritikëve që e cilësuan atë si “sensacionalizëm”. Edhe në Norvegji, komandanti i ushtrisë Eirik Kristoffersen shprehu shqetësim në televizionin publik NRK. “Nëse Rusia riarmatoset, siç ka njoftuar, atëherë kërcënimi ushtarak ndaj Norvegjisë do të rritet”, tha ai.
Plane ruse për luftë në krahun lindor të NATO-s? Finlanda mbetet e qetë
Në Finlandë, megjithatë, toni është krejtësisht ndryshe. Presidenti Alexander Stubb tha se situata po monitorohet nga afër, por nuk sheh arsye për panik.
“Unë kam një mendim krejt tjetër,” deklaroi ai për gazetën Hufvudstadsbladet, duke shtuar se “qëllimi i Rusisë është të destabilizojë Evropën dhe vendet evropiane.”
Ai shtoi: “si President, Komandant i Përgjithshëm dhe si finlandez, nuk shoh asnjë shenjë që kjo [një sulm rus, shënim i redaksisë] do të ndodhë.”
Stubb, ish-ministër i Jashtëm dhe ish-kryeministër i Finlandës, konsiderohet njohës i mirë i Rusisë. Që në vitin 2008 ai kishte paralajmëruar për rikthimin e Moskës drejt një politike nacionaliste me ambicie për statusin e superfuqisë. Ai shihet gjithashtu si një nga zërat më të fortë evropianë dhe marrëdhëniet e tij të mira me presidentin amerikan Donald Trump konsiderohen një avantazh për NATO-n.
Edhe Ryhor Nizhnikau, ekspert për Rusinë në Institutin Finlandez për Politikën e Jashtme, ndan të njëjtin vlerësim. “Nuk ekziston një rrezik i menjëhershëm,” tha ai për Tagesspiegel.
“Aktualisht nuk ka arsye të mendohet se riarmatimi pranë kufirit përbën një kërcënim të menjëhershëm. Sapo të zhvendosen trupa në atë zonë, situata ndryshon plotësisht.”
Mënyra e veprimit të Putinit kundër NATO-s
Megjithatë, Nizhnikau paralajmëron për një dimension tjetër të strategjisë ruse: ndikimin hibrid.
Sipas tij, kjo përfshin sulmet kibernetike, sabotimet dhe fushatat e koordinuara të dezinformimit. Si shembull ai përmend aktivisten finlandeze Sally Rajski, e cila shfaqet në mediat ruse si luftëtare kundër të ashtuquajturës “rusofobi”.
Në Instagram ajo shpërndan narrativa që përsërisin motive tipike të propagandës ruse, si pretendimet se Finlanda është e dominuar nga fashizmi ose se Perëndimi përhap gënjeshtra antiruse.
“Ne po shohim se Moska po i kushton Finlandës një vëmendje të madhe”, tha Nizhnikau, duke shtuar se “ndryshimi i diskursit publik për Finlandën brenda vetë Rusisë është një zhvillim shumë negativ”.
Ai shtoi se tradicionalisht imazhi i Finlandës tek qytetarët rusë kishte qenë pozitiv.
Këto fushata mbështeten edhe nga figura politike në Moskë. Ish-presidenti rus Dmitry Medvedev deklaroi në një intervistë për agjencinë shtetërore TASS se Finlanda kishte sulmuar Bashkimin Sovjetik në vitin 1941 “me egërsi të hapur”, në krah të Adolf Hitlerit.
Historikisht, është e saktë se Finlanda, pas Luftës së Dimrit të shkaktuar nga Bashkimi Sovjetik në vitin 1939, u përpoq të rimerrte territoret e humbura. Megjithatë, ajo nuk kishte afërsi ideologjike me nazizmin. Kremlini e përdor sot këtë episod për ta paraqitur Finlandën si një shtet “fashist”.
“Do të mbrohet çdo centimetër” i territorit të NATO-s
Ndërsa Helsinki përpiqet të qetësojë situatën, partnerët e NATO-s në Poloni po shprehen gjithnjë e më të alarmuar.
“Ne po shohim zhvillimet në Ukrainë dhe faktin që lufta nuk po ecën mirë për Rusinë. Kjo është arsye për shqetësim, sepse Moska mund të përpiqet ta përshkallëzojë më tej situatën,” tha për gazetën Rzeczpospolita koloneli Pawel Szota, shef i shërbimit polak të inteligjencës ushtarake.
Sipas tij, Rusia mund të ndërmarrë një sulm të kufizuar ndaj vendeve baltike duke përdorur të ashtuquajturit “burra të gjelbër”, ushtarë pa shenja identifikuese, siç ndodhi në Krime në vitin 2014. “Rusia po i kalon sistematikisht vijat e kuqe për të testuar reagimin e NATO-s,” paralajmëroi ai.
Ministri i Jashtëm polak Radosław Sikorski deklaroi për televizionin amerikan CBS se “ne duhet t’i bëjmë të qartë Putinit se e dimë çfarë synon të bëjë, se nuk do të biem në kurthin e tij, se kjo është krejtësisht e papranueshme dhe se do të mbrojmë çdo centimetër të territorit të NATO-s.”
Në të njëjtën linjë u shpreh së fundmi edhe gjenerallejtënanti Holger Neumann. Sipas shefit të Forcave Ajrore gjermane, Gjermania është e gatshme “që sonte” të luftojë kundër Rusisë dhe të mbrojë “çdo centimetër” të territorit të NATO-s, deklaratë e dhënë për gazetën britanike The Telegraph.
Ai shtoi se, nëse presidenti rus Vladimir Putin do të guxonte të sulmonte NATO-n, Aleanca do të ndërmerrte sulme shkatërruese kundër Rusisë. Neumann theksoi gjithashtu se brenda NATO-s “nuk ka zona të ndryshme sigurie”, çka do të thotë se çdo sulm ndaj krahut lindor të Aleancës do të sillte një përgjigje ushtarake. /Përshtati Pamfleti nga Fr.de/
