Protestat e përditshme para Kryeministrisë dhe rritja e jehonës së tyre në rrjetet sociale duket se kanë shtuar shqetësimin në radhët e mazhorancës.
Pak ditë pasi Edi Rama mblodhi deputetët dhe ministrat në Pallatin e Brigadave, duke u kërkuar më shumë angazhim publik dhe aktivitet në rrjetet sociale përballë protestës, duket se makineria e Partisë Socialiste është vënë në lëvizje.
Sot ka pasur një sulm masiv ndaj Dritan Goxhajt, duke dashur ta shpallin si agjent të Iranit, për të delegjitimuar protestën. Dhe ky sulm nuk ka qenë rastësor.
Sipas gazetarit Ferdinand Dervishi, të gjithë ministrat kanë zhvilluar mbledhje me stafet dhe kanë dhënë urdhra të bëjnë sa më shumë postime dhe reagime në rrjetet sociale. Sipas Dervishit, më i devotshmi ka qenë Blendi Gonxhe, i cili ka mbajtur 5 orë mbledhje.
“Sot të gjithë ministrat paskan bërë mbledhje të gjata dhe dhënë urdhra të prerë si të veprojnë me rrjetet sociale. Dmth, luftë algoritmit! PS: Rekordin e ka thyer ministri dhjetorist i vitit 1990 me 5 orë mbledhje”, shkruan ai.
Makineria e qeverisë është vënë në lëvizje pas ultimatumit që dha Edi Rama në Pallatin e Brigadave. Rama u ankua se nuk ishin fare mirë me “algoritmin”, duke u kërkuar të jenë aktivë në rrjetet sociale. Sipas kreut socialist, protestat po dominonin në rrjetet sociale dhe shumica e deputetëve nuk po reagonin.
Por sot u pa një sulm i koordinuar kundër Goxhajt, çka dëshmon se mbledhjet kanë dhënë efekt. Patronazhistët (pasi ata punojnë nëpër ministri) tani do të përdoren për të shtypur protestën.