Presidenti amerikan shpërfilli kundërpropozimet e Iranit, për dialogun për fundin e luftës. Donald Trump tha se SHBA-të nuk do të lejojë kurrë Teheranin të zhvillojë armë bërthamore dhe nuk përjashtoi mundësinë e ridërgimit të anijeve ushtarake për të mbrojtur nga Irani, mjetet lundruese tregtare në Gjirin Persik.
Donald Trump përdori fjalë shpërfillëse ndaj kundërpropozimit, me të cilin Teherani refuzoi memorandumin me 14 pika për fundin e konfliktin me SHBA-të.
“Na japin një propozim budalla. Është propozim budalla, që askush s’do e pranonte”, tha Trump.
Shefi i Shtëpisë së Bardhë mendon se me qasjen e tyre, iranianët po përpiqen të lodhin amerikanët dhe t’i detyrojnë të tërhiqen.
“Irani nuk mund të ketë dhe nuk do të ketë armë bërthamore. Nuk duhej të kishte shkuar kaq larg. Për 47 vite, liderë të tjerë vendesh duhet ta kishin penguar, por nuk e bënë. Kaq budallenj janë sa mendojnë se unë do lodhem?”, u shpreh Trump.
Donald Trump nuk përjashtoi mundësinë e rinisjes së operacionit “Liria” për të mbrojtur me ushtri, anijet tregtare nga vendet e Gjirit që duan të dalin nga ngushtica e Hormuzit. Presidenti amerikan tha se një grup i madh gjeneralësh po presin të diskutojnë me të çështjen e Iranit.
Mes frikës se konflikti do të vazhdojë gjatë, nafta e papërpunuar në bursën e Londrës u rrit me rreth 4 dollarë duke arritur në 104 dollarë për fuçi. Në një intervistë për mediat amerikane, Trump tha se po shqyrton mundësinë e heqjes së taksës për benzinën me qëllim, frenimin e rritjes së ndjeshme të çmimit për amerikanët në pikat e karburantit.
Kundërpropozimi i Teheranit përfshinte ndër të tjera një kërkesë për kompensim për dëmet e luftës dhe theks mbi sovranitetin iranian mbi Ngushticën e Hormuzit, ndërsa nuk përmendte fare fundin e programit bërthamor siç kërkon Uashingtoni dhe Tel Avivi.
