Në seancën plenare në Kuvend, kreu i Grupit Parlamentar të PS-së, Taulant Balla, ka reaguar pas protestës së Partisë Demokratike, ku 16 efektivë të Policisë së Shtetit u plagosën.
Balla bëri thirrje që Prokuroria të aplikojë masa shtesë për të siguruar paprekshmërinë e uniformës së policisë, duke i kërkuar Kuvendit të shprehet me urgjencë në mbështetje të punonjësve të rendit.
“Dua t’i bëj thirrje PD të distancohet nga dhuna e përsëritur nga protesta e thirrura nga kjo parti. Çdo parti ka të drejtë të protestojë, por mban përgjegjësi për mbarëvajtjen e kësaj proteste. Duket qarte se personat e përfshirë në akte dhune, janë të paguar dhe të nxitur për të kryer këto akte dhune. Kuvendi me urgjencë duhet të shprehet në mbrojtje të punonjësve të Policisë së Shtetit. Të kërkojmë nga prokuroria aplikimin e të gjitha atyre masave shtesë që kemi marrë në vitin 2019-2020 për paprekshmërinë e uniformës së Policisë së Shtetit”, tha Balla.
Protesta e zhvilluar në bulevardin “Dëshmorët e Kombit” më 10 shkurt u shoqërua me tensione dhe përplasje, ndërsa Policia njoftoi se ka arrestuar 21 persona dhe vuri në hetim 4 anëtarë të PD-së dhe sekretarin organizativ, të përfshirë në aktet e dhunës.
