Për të kryer një vrasje “perfekte”, dhe që autoritetet ta kenë të vështirë gjetjen e autorëve, këta të fundit, sendet për arritjen finale të qëllimit nisin t’i sigurojnë shumë kohë më herë. Përveç armëve, të cilat gjenden në shumë raste përmes një aleance të pashkruar biznesi me grupe të tjera kriminale, me rëndësi janë makinat që do të përdoren për krimin.
Edhe vitin që lamë pas, nuk munguan rastet që makinat e përdorura në atentate të frikshme, u trafikuan nga jashtë. Por jo gjithmonë përdoren për krime. Shitja e tyre pasi fillimisht janë vjedhur në vendet evropiane, është një treg i zi i lakmuar.
Në disa raste, një punë e mirë e Antitrafiqeve, ka sjell si rezultat pikasjen e tyre dhe rrjedhimisht sekuestrimin. Një raport i Ministrisë së Brendshme nënvizon se gjatë vitit 2025, u evidentuan 224 raste të trafikimit të mjeteve motorike, 10 më shumë se sa në 2024. Kryesisht janë makina luksoze, por që nuk mungojnë edhe motoçikletat për të pasionuarit.
Tipike janë vjedhjet e në Gjermani dhe disa shtete të tjera, për t’i shitur në Shqipëri. Në shumë raste blerësi brenda vendit nuk është në dijeni, por kjo nuk i ka shpëtuar nga hetimi në gjendje të lirë. Makinat që sillen në mënyrë të paligjshme, shpesh pajisen me dokumentacion fals me akte shitjesh.
Nga ana tjetër, të dhënat zyrtare flasin për vijimësi të trafikimit të armëve. Trendi është në vijueshmëri, pavarësisht se krahasuar me 2024-ën ka ulje. Vitin që lamë pas, Antitrafiqet goditën 32 raste, 9 më pak se në 2024-ën.
Në Shqipëri të rralla janë rastet që atentatet kryhen me armë të trashëguara nga 1997-a, përveç rasteve të krimit në familje. Agresiviteti i grupeve kriminale dhe financimi i tyre u ka dhënë luksin për përdorimin e armëve të reja, në mënyrë që dështimi të jetë sa më i vogël. Armë automatike të reja dhe pistoleta prodhim i markave prestigjioze perëndimore që trafikohen brenda vendit, kryesisht përmes kufirit tokësor, por jo vetëm.
Armët e kapura edhe vitin që lamë pas vijnë kryesisht nga Serbia, kalojnë në Kosovë dhe në fund brenda vendit. Grupet kriminale që merren vetëm me trafikimin, i sheshin në çmime që variojnë nga 500 deri në 2 mijë euro, në grupe të tjera që kanë hesape të pambyllura. Territori i vendit përdoret për kalim të armëve edhe në Greqi. Një treg i lakmueshëm është kalimi i pistoletave edhe përmes porteve dhe aeroporteve, kryesisht në drejtim të Britanisë së Madhe.
Strukturat e rendit e konsiderojnë këtë fenomen si një kërcënim serioz, ndërsa theksojnë se lufta ndaj tij kërkon bashkëpunim të ngushtë ndërkombëtar dhe goditje të rrjeteve financiare që e mbajnë gjallë këtë treg të zi.
