Policia e Shtetit ka paralajmëruar qytetarët për një skemë mashtruese që synonte marrjen e kredive online, por fatmirësisht nuk ka pasur persona të prekur.
Zëdhënësi i Policisë së Shtetit, Genti Mullaji, deklaroi në “Kohë Reale” se Drejtoria e Krimit Kibernetik ka ndërhyrë në kohë duke parandaluar pasojat e mundshme.
“Nuk është prekur asnjë qytetar nga kjo skemë mashtrimi sepse Drejtoria e Krimit Kibernitik ka ndërhyrë në kohë. Nuk ka persona që kanë bërë denoncim. Një hajdut interneti piketon ato kërkesa që ka më shumë komuniteti. Te posta, të gjithë bëjnë një blerje online, sidomos blerjet online janë tmerr. Edhe te kredia sepse e kanë të lehtë pasi ka qytetarë me kushte të vështira ekonomike dhe kërkojnë kredi pa plotësuar shumë kushte dhe në fillim i duket e lehtë për ta marrë kredinë dhe bien pre e këtij mashtrimi,” tha Mullaji.
Ai shtoi se skemat e mashtrimit nuk janë rastësore, por të studiuara mirë nga autorët, të cilët shfrytëzojnë dobësitë digjitale të qytetarëve.
“Analiza e riskut ka nxjerrë që nuk ka një kategori të caktuar qytetarësh, por pre e këtyre bien ata që nuk kanë njohuri digjitale. Nuk ka një target moshe. Ata e studiojnë mirë tregun dhe ndërhyjnë për të mashtruar,” theksoi Mullaji.
Policia u bën thirrje qytetarëve të tregojnë kujdes ndaj ofertave të dyshimta për kredi apo blerje online, duke verifikuar gjithmonë burimin dhe sigurinë e platformave ku kryejnë transaksione.
