Sot është një datë simbolike, që ndihmon për të kuptuar më mirë luftën në Ukrainë dhe, mbi të gjitha, për të rrëzuar narrativën e pathyeshmërisë së Rusisë, të ushqyer edhe nga Donald Trump. Kanë kaluar plot 1 mijë e 415 ditë nga fillimi i pushtimit të urdhëruar nga Vladimir Putin, saktësisht e njëjta kohëzgjatje që pati Lufta e Dytë Botërore për Bashkimin Sovjetik.
Sulmi gjerman ndaj Bashkimit Sovjetik nisi më 22 qershor 1941 dhe përfundoi më 7 maj 1945 me kapitullimin pa kushte të Rajhut të Tretë. Brenda atij harku kohor, Ushtria e Kuqe u tërhoq duke luftuar deri në portat e Moskës, më pas, pas betejës së Stalingradit kaloi në ofensivë, pushtoi Berlinin dhe mori kontrollin e gjithë Europës Lindore, nga Bullgaria deri në Republikat Baltike.
Ku ndodhet sot lufta në Ukrainë
Në gati katër vite luftimesh, Rusia ka pushtuar Mariupolin dhe bregdetin e Detit të Azovit, si dhe disa zona fushore të rajoneve Zaporizhzhia dhe Kherson. Megjithatë, as objektivi fillestar i “çlirimit” të Donbass-it nuk është arritur. Forcat ukrainase vazhdojnë të rezistojnë në bastionet e fundit të Donetskut dhe as rënia e Pokrovskut, e shpallur nga presidenti rus më 1 dhjetor, nuk është konkretizuar ende.
Një krahasim i ashpër në shifra
Të dhënat flasin qartë. Në ofensivën fillestare të pranverës 2022, trupat ruse pushtuan rreth 119 mijë kilometra katrorë territor ukrainas. Kundërofensiva e Kievit deri në dhjetor rimori mbi 74 mijë kilometra katrorë. Pas një viti 2023 kryesisht mbrojtës, Rusia rifilloi avancimin në 2024 duke pushtuar 4.168 kilometra katrorë, ndërsa vitin pasues edhe 4.700 të tjerë. Bilanci total është 53.868 kilometra katrorë – afërsisht sipërfaqja e Lombardisë, Piemontes dhe Ligurisë së marra së bashku.
Në të njëjtën periudhë kohore, Ushtria e Stalinit humbi dhe rimori 1,6 milionë kilometra katrorë territor sovjetik dhe më pas dëboi forcat gjermane nga 1,1 milionë kilometra katrorë të Europës Lindore.
Bilanci i viktimave: Dje dhe sot
Fitorja sovjetike kundër nazizmit pati një kosto njerëzore kolosale: rreth 27 milionë të vdekur, nga të cilët afro 18 milionë civilë. Kjo përkthehet në rreth 10 viktima për çdo kilometër katror, ose rreth tre ushtarë të rënë për kilometër katror, nëse llogariten vetëm humbjet ushtarake.
Sot, vlerësimet për humbjet ruse në Ukrainë variojnë nga 250 mijë deri në 350 mijë ushtarë të vrarë. Kjo do të thotë mes pesë dhe shtatë të rënë për çdo kilometër katror të marrë Ukrainës, një tregues i brutalitetit ekstrem të luftimeve, me një nivel vdekjeprurës që, sipas vëzhguesve, është rritur muajt e fundit.
Vështirësitë e Kremlinit
Këto shifra nuk kanë vlerë të plotë statistikore, sepse natyra e dy konflikteve është shumë e ndryshme. Lufta totale e viteve 1939–1945, që shkatërroi kontinentin europian, fatmirësisht nuk po përsëritet, edhe pse numri i qyteteve dhe fshatrave të shkatërruara në Donbass vazhdon të rritet.
Megjithatë, paralelizmi i 1 mijë e 415 ditëve nxjerr në pah vështirësitë e Rusisë në terren, pavarësisht se ajo ka pushtuar një vend shumë më të vogël, më pak të populluar dhe më pak të pasur. Dhe nuk janë vetëm ndihmat ushtarake perëndimore ato që kanë ndalur avancimin e Moskës, ndihmat amerikane janë ndërprerë që në qershorin e kaluar, por mbi të gjitha vendosmëria dhe organizimi i Ukrainës.
Çfarë nuk ka bërë ende Putini
Në këtë krahasim duhet pasur parasysh një faktor kyç: Rusia nuk ka angazhuar të gjitha burimet e saj njerëzore dhe ekonomike. Putini nuk ka shpallur mobilizim të përgjithshëm. Në front shkojnë kryesisht vullnetarë dhe rreth 30 mijë persona çdo muaj rekrutohen, të tërhequr nga paga shumë të larta dhe paketa përfitimesh.
Eksportet e lëndëve të para kanë mbajtur gjallë industrinë e armëve, pa ulur shpenzimet publike në sektorë të tjerë dhe pa rritur taksat. Kjo ka ndihmuar Kremlinin të ruajë, deri tani, konsensusin e brendshëm. Por viti i ri pritet të jetë problematik: rënia e çmimit të naftës, masat amerikane kundër kontrabandës së naftës ruse, rritja e borxhit shtetëror dhe kostoja e ushtrisë po rëndojnë financat, aq sa janë vendosur për herë të parë taksa të reja.
Një luftë që duhet ndalur
Vuajtjet e Ukrainës janë të dukshme për të gjithë. Bombardimet e rrjetit elektrik e kanë kthyer dimrin në një makth, ndërsa humbjet njerëzore, sipas BBC-së rreth 140 mijë ushtarë të vrarë, po fshijnë një brez të tërë.
Pas 1 mijë e 415 ditësh, kjo masakër ka nevojë të ndalet. Por, deri tani, askush nuk ka gjetur formulën për një “paqe të drejtë”.
Shkrim nga La Reppublica
