Zv.kryeministrja dhe ministrja e Infrastrukturës dhe Energjisë, Belinda Balluku, ka reaguar mbi situatën e krijuar nga moti i keq që ka përfshirë vendin.
Ajo theksoi se të gjitha strukturat e ministrisë janë në terren që prej orëve të para të ditës, duke ndërhyrë pa ndërprerje për normalizimin e problematikave të shkaktuara nga reshjet intensive.
Në një reagim në rrjetet sociale të Facebook, Balluku u ndal tek akset rrugore, ku reshjet e shiut dhe dëborës kanë sjellë rënie gurësh, inertesh dhe prani uji në disa segmente, duke theksuar se kontraktorët me mjete e punëtorë po punojnë pa pushim për pastrimin e rrugëve dhe garantimin e qarkullimit.
Akset rrugore
Balluku u ndal tek akset rrugore, ku reshjet kanë sjellë rënie gurësh, inertesh dhe prani uji në disa segmente, si Bajram Curri–Valbonë, Ura Bujan–Qafë Morinë, Kukës–Krumë, Kukës–Shishtavec, Vorë–Maminas dhe Dedaj–Bogë. Ajo sqaroi se kontraktorët me mjete e punëtorë po punojnë pa pushim për pastrimin e rrugëve dhe garantimin e qarkullimit. “Kontraktorët kanë qenë në terren pa ndërprerje për të bërë pastrimin e akseve dhe për të siguruar lëvizjen e qytetarëve”, u shpreh ministrja.
Furnizimi me energji elektrike
Sa i përket energjisë, Balluku bëri të ditur se aktualisht janë 22 fidera jashtë pune, kryesisht në rajonin e Durrësit, për shkak të prezencës së ujit në kabina. Ajo shtoi se ekipet e OSHEE dhe OST janë në terren për rikthimin e energjisë, ndërsa linjat 35kV dhe nënstacionet furnizojnë normalisht. Në nënstacionin Rrashbull, ku ka prani të shtuar uji, po merren masa për evadimin e tij në bashkëpunim me Emergjencat Civile.
Rrjeti i transmetimit dhe kaskada e Drinit
Balluku theksoi se rrjeti i transmetimit po funksionon normalisht, me të gjitha linjat 400 kV, 220 kV dhe 110 kV në operim. Ndërkohë, prurjet në HEC Koman dhe HEC Vau i Dejës vijojnë të mbeten të larta, por njësitë prodhuese po punojnë me kapacitet të plotë. “Uji i ardhur përpunohet për vënien në punë të njësive prodhuese, rezervohet në liqene brenda kuotave të lejuara dhe pjesa tjetër shkarkohet në mënyrë të detyrueshme, me qëllim garantimin e sigurisë së veprave prodhuese”, tha Balluku.
Furnizimi me ujë dhe portet
Në rajonin e Durrësit situata paraqitet problematike për shkak të reshjeve intensive, me nivelin e kanalit të hidrovorit në maksimum, por stacionet e pompave janë në funksion të plotë. Ministrja sqaroi se në pjesën tjetër të rajoneve nuk janë evidentuar problematika në furnizimin me ujë.
Sa i përket porteve dhe aeroportit, Balluku informoi se operimet në Portin e Durrësit dhe Aeroportin “Nënë Tereza” vijojnë normalisht, ndërsa në Vlorë kapiteneria ka pezulluar daljen e anijeve të vogla për shkak të kushteve të motit.
Balluku siguroi qytetarët se situata është nën monitorim të vazhdueshëm dhe çdo zhvillim po menaxhohet në kohë reale.
“Të gjitha strukturat e Ministrisë së Infrastrukturës dhe Energjisë janë në terren pa ndërprerje. Po punohet me intensitet për pastrimin e akseve rrugore, rikthimin e energjisë elektrike dhe monitorimin e prurjeve në kaskadën e Drinit. Situata është nën vëzhgim të vazhdueshëm dhe çdo zhvillim po menaxhohet në kohë reale”, u shpreh Balluku.
