Një punonjës i Pallatit Elysee në Paris është vënë në pranga, së bashku me dy persona të tjerë, nën dyshimin se kanë vjedhur objekte të çmuara prej argjendi dhe porcelani nga rezidenca zyrtare e presidentit të Francës. Arrestimet u kryen javën e kaluar, pas një hetimi të nisur nga autoritetet franceze.
Sipas hetuesve, të dyshuarit kanë marrë sende nga ambientet e pallatit presidencial dhe kanë tentuar t’i shesin ato përmes platformave të ankandeve online, përfshirë faqen Vinted.
Vënia në dijeni e autoriteteve u bë nga kryeadministratori i Elysee-së, pasi u konstatua mungesa e disa objekteve, disa prej të cilave konsiderohen pjesë e trashëgimisë kombëtare franceze.
Vlera e përgjithshme e sendeve të zhdukura llogaritet deri në 40 mijë euro. Gjatë kontrolleve, policia gjeti rreth 100 objekte në banesën, automjetin dhe dollapin personal të punonjësit të arrestuar. Mes tyre kishte porcelan Sevres, një statujë të firmosur nga René Lalique, kupa shampanje Baccarat si dhe enë bakri.
Të arrestuarit janë paraqitur para gjykatës më 18 dhjetor, ndërsa procesi gjyqësor ndaj tyre pritet të zhvillohet më 26 shkurt.