Detaje të reja kanë dalë lidhur me ngjarjen e regjistruar mbrëmjen e së dielës në kryeqytet ku 40-vjeçari, Marilen Jata u qëllua me armë zjarri dhe mbeti i plagosur.
Përmes një njoftimi zyrtar, blutë e Tiranës bëjnë me dije se falë hetime u bë i mundur identifikimi i autorit të plagosjes së 40-vjeçarit. Mësohet se ka qenë 36-vjeçari Fatmir Frroku, ai i cili rreth orës 22:20 të mbrëmjes së djeshme, në zonë ne Institutit në Tiranë, qëlloi me armë zjarri në këmbë mikun e tij Jata.
Ky i fundit dhe 36-vjeçari kanë qenë shok me njëri-tjetrin, mirëpo prej tre muajsh nuk flisnin me njëri-tjetrit.
Ngjarja ndodhi rreth orës 22:20 të mbrëmjes së djeshme ku sapo Jata u fut në rrugicën “Ramadan Citaku”, Frroku i preu rrugën dhe e qëlloi me pistoletë.
Menjëherë pas plagosjes ai u arratis, ndërkohë që 40-vjeçari u dërgua me urgjencë ne Spitali i Traumës ku dhe vijon të jetë nën kujdesin e mjekëve.
Policia po punon për kapjen e Frrokut, ndërkohë që në orët në vijim pritet të merret në pyetje edhe vetë Marilen Jeta me qëllim për të hedhur më tepër dritë lidhur me këtë ngjarje.
“Shërbimet e Sektorit për Hetimin e Krimit ndaj Pronës dhe Jetës, mbrëmjen e djeshme, pas marrjes së njoftimit se në rrugën “Ramadan Citaku”, një shtetas kishte plagosur në këmbë me armë zjarri shtetasin M. J., 40 vjeç, organizuan menjëherë punën për identifikimin dhe kapjen e autorit.
U bë e mundur identifikimi i autorit të dyshuar të ngjarjes, shtetasit F. F., 36 vjeç, i cili, pas një konflikti për motive të dobëta, rreth orës 22:20 të mbrëmjes së djeshme, plagosi me armë zjarri në këmbë shtetasin M. J. Ky i fundit ndodhet në spital, aktualisht jashtë rrezikut për jetën.
Vijon puna intensive për kapjen e shtetasit F. F dhe dokumentimin e plotë të rastit. Materialet i kaluan Prokurorisë, për veprime të mëtejshme procedurale”, njofton Policia.