Një shtetas finlandez i shpallur në kërkim ndërkombëtar është arrestuar në zonën e Laprakës, në Tiranë. Arrestimi u krye me qëllim ekstradimin e tij drejt Finlandës.
Falë informacioneve të përfituara nga Seksioni i Kërkimit, në bashkëpunim me Sektorin e Krimeve të Rënda dhe Drejtorinë Vendore të Policisë Vlorë, si dhe përmes shkëmbimit të të dhënave me Interpol Tiranë, u bë i mundur ndalimi i shtetasit L. E., 30 vjeç, me shtetësi finlandeze.
Ky shtetas ishte shpallur në kërkim nga autoritetet e Finlandës Perëndimore, pasi ndaj tij ishte caktuar masa e sigurisë “Arrest me burg” për një sërë veprash penale të rënda, përfshirë:
-Hyrje në banesë private
-Vjedhje me dhunë
-Shtrëngim me anë të kanosjes për dhënie pasurie (mbetur në tentativë)
-Heqje e paligjshme e lirisë